Nanganganib na kulangin na ang supply ng tubig sa Metro Manila sa susunod na taon.

Ayon sa National Water Resources Board, hanggang 2017 na lamang makapag su-supply ng sapat na tubig ang Angat Dam sa Metro Manila dahil sa lumalaking populasyon at demand.

Ibig sabihin, mababawasan ang alokasyon ng tubig sa Metro Manila at posibleng mas maging madalas ang water interruption

Maging ang mga irigasyon, nanganganib na hindi na rin ma-supplyan ng tubig na ang maapektuhan ng husto ay ang mga pananim.

Sa ngayon ay sapat ang supply ng tubig sa Metro Manila dahil sa naka-imbak na tubig sa Angat Dam dahil sa dalawang bagyo na dumaan sa bansa noong nakaraang taon

Subalit dahil hindi naman nadadagdagan ang imbak na tubig sa Angat Dam at sa lumalaking populasyon at inaasahang pagtaas ng demand sa Metro Manila ay baka kulangin na ito sa susunod na taon.

Ang nakikitang solusyon ng pamahalaan ay magtayo pa ng mga dam.

Tatlo ang planong itayo ng pamahalaan at ang mga ito ay ang Laiban, Kaliwa at Kanam Dam sa Nakar Quezon.

Ang problema tatagal ng lima hanggang anim na taon ang pagtatayo ng mga dam kaya hindi rin kaagad makakatulong sa naka-ambang kakulangan ng suplay ng tubig sa susunod na taon.

Dahil dito pipilitin ng NWRB napagkasyahin ang tubig sa Angat Dam hangang sa maging operational ang mga itatayong dam.

Tungkol naman sa pagtatayo ng mga dam sa Quezon, pinangangambahan na tutulan ito ng mga katutubo at magsasaka.

Ayon sa NWRB, walang ibang paraan na magagawa sila kundi ang bawasan ng dalawampung porysento ang alokasyon ng tubig sa Metro Manila sa 2017 at payuhanang lahat na magtipid sa paggamit ng tubig.

(Mon Jocson/UNTV News)

Tags: Angat Dam, National Water Resources Board, supply ng tubig