Tiniyak ni Presidential Communications Secretary Martin Andanar na nasa maayos na pag-iisip si Pangulong Rodrigo Duterte, ito ang kaniyang reaksyon sa inilabas na pahayag ng Tindig Pilipinas, isang cause-oriented group na nagsabing nawawala na umano sa wastong pag-iisip si Pangulong Duterte nang magbanta itong magtayo ng isang revolutionary government.

Inanunsyo ito ng punong ehekutibo sa isang panayam noong nakalipas na linggo kung lalala umano ang gulo sa Pilipinas dahil sa mga planong destabilisasyon laban sa Pamahalaan.

Ayon sa Tindig Pilipinas, paranoid at insecure lang ang mag-isip na ipatupad ang revolutionary government.

Napa-paranoid na rin anila ang punong ehekutibo dahil sa bumababang ratings nito at tumitinding mga protesta laban sa administrasyon.

Subalit ayon kay Secretary Andanar, nagpapakalat ng kasinungalingan ang Tindig Pilipinas para isulong ang makasariling interes at ilihis ang konsentrasyon ng pamahalaan sa mas mahahalagang isyu.

Gayunman, di aniya papaapekto sa mga ito ang administrasyong Duterte at gagawin kung ano ang mga ipinangako sa taumbayan.

( Rosalie Coz / UNTV Correspondent )

Tags: Administrasyong Duterte, PCO Andanar, Tindig Pilipinas