METRO MANILA – Matapos ang maaksiyong 2nd Round Eliminations ng UNTV Cup Season 10 noong March 3, kumpleto na ang huling 4 na koponang natitira upang makuha ang championship title ng liga ng public servants.
Dahil sa Top 1 and 2 finish ng Social Security System (SSS) Kabalikat at Department of Agriculture (DA) Food Master noong elimination rounds, sigurado na ang kanilang unang semifinal appearance sa liga.
Habang naghahanda ang SSS at DA sa semis, tila lumusot naman sa butas ng karayom ang defending champion Armed Forces of the Philippines (AFP) Cavaliers at Office of the Ombudsman Graftbusters sa nagdaang quarterfinals para sa 2 natitirang semis slot.
Pagpasok ng quarters, napanatili ng AFP Cavaliers ang top seed na may kartadang 11-5 upang pumuwesto sa semis samantalang dumaan sa win or go home match sa Novadeci Convention Center, Quezon City ang Ombudsman (9-6) kalaban ang DENR Warriors (9-6) na sa score na 68-67 ay unang beses papasok ang Ombudsman sa final 4.
Ayon sa semifinal format ng Sports & Charity league, magtutuos sa best-of-three series ang kapwa semifinal contender SSS Kabalikat kontra Ombudsman Graftbusters maging ang Agriculture Food Master kalaban ang beteranong AFP Cavaliers na magsisimula sa March 6.
Ang sinomang mananalo sa 2 head-to-head match-up ay aabante sa Finals upang hiranging kampeon ng kasalukuyang season at ang matatalo sa semis ay may huling laban para sa Battle for Third.
(Judren Soriano | La Verdad Correspondent)
Tags: Semi Finals, UNTV Cup Season 10
METRO MANILA – Dumagundong ang PhilSports Arena, Pasig City nitong Lunes (April 15) dahil sa intense game ng UNTV Cup Season 10 Do-or-Die Finals Game 3 sa pagitan ng mga first-time finalist na Social Security System (SSS) Kabalikat at Department of Agriculture (DA) Food Master.
Sa opening quarter ng winner take-all match, hindi nagpaawat ang 2 koponan na makuha ang lamang at bilang resulta ay dikit ng 2 possession ang Agriculture, 25-21. Naging constant ang pace ng ball game sa sumunod na 10 minuto kung saan mula sa 4 na puntos ay naibaba ito ng SSS sa three-point deficit pagsapit ng halftime, 46-49.
Pagsapit ng second half ay bumulusok ng 19-7 run ang Food Master dahil sa magandang ball movement at fast break points upang isagad sa 17 points ang hahabulin ng Kabalikat sa final frame. Dito ay inalagaan ng DA ang double-digit lead at matapos ang 40-minute hardcourt action, isinara ng Agriculture Food Master ang kabanata upang tanghaling kampeon sa score na 101-80.
Bukod sa unang championship title magmula nang sumali ang DA Food Masters noong season 6, nakatanggap din ang koponan ng ₱3-M para sa kanilang napiling benepisyaryo na Rosita Soliman Foundation Inc. habang ₱2-M naman ang maiuuwi ng SSS Kabalikat para sa kanilang tutulungang charitable institution na SSS Provident Fund.
Labis ang pasalamat ni Breakthrough and Milestones Productions International (BMPI) President and CEO Kuya Daniel S. Razon sa mga koponang nakibahagi sa isang dekada ng isports at kawanggawa na kung saan sa pamamagitan ng liga ay nagiging kasangkapan ang mga lingkod-bayan upang makaabot sa mga taong nangangailangan ng tulong at makagawa ng mabuti sa kapwa.
(Judren Soriano | La Verdad Correspondent)
METRO MANILA – Sa 14 na koponang kasali sa 10th season ng UNTV Cup, 8 na lamang ang natitirang makikipagtagisan upang hiranging kampeon ng naturang sports and charity league.
Matapos ang 2nd round eliminations ng liga noong February 14, 2024, nakatikim ng unang playoff appearance ang SSS Kabalikat at ika-2 naman sa Agriculture Food Master na kapwa makakakuha ng automatic semifinal slot dahil sa kanilang top 1&2 finish na may 8-3 win-loss record.
Dahil sa semis advantage ay mag-aabang ang SSS at DA ng kanilang makakalaban sa gagawing round-robin quarterfinal eliminations ng mga koponang nakaupo sa top 3-8 ng team standings na kinabibilangan ng defending champion AFP Cavaliers (8-3), NHA Home Masters (7-4), DENR Warriors (7-4), Senate Defenders (6-5), Ombudsman Graftbusters (6-5), at GSIS Furies (5-6) na mag-uumpisa sa February 18, 2024.
Kasabay ng pagpasok ng walong koponan sa playoffs ay magpapaalam naman sa liga ng public servants ang dating playoff contenders na PNP Responders at OP-PMS Trailblazers na nakapagtala ng 4-7 na kartada.
Samantala nauna nang na-eliminate noong first round ang rookie teams COMELEC Vanguards, DFA Emissaries, returning team DOJ Beacons, at ang Season 9 Runner-up Judiciary Magis.
(Judren Soriano | La Verdad Correspondent)
Tags: UNTV Cup Season 10
