Isang special task group na tinawag na Taskforce Odicta ang binuo ng PNP upang imbestigahan ang pagkamatay ng mag-asawang Merriam at Melvin Odicta.

Ayon sa Police Regional Office 6 ang Aklan Police Provincial Office ang tututok upang alamin kung sino ang nasa likod ng pagpatay sa mag-asawa.

Sa initial autopsy result ng SOCO nagtamo ng tama sa kanang bahagi ng ulo na tumagos pa sa kanyang tainga si Melvin Odicta, may tama rin ito sa kanang bahagi ng dibdib, puwet at paa.

Isang tama naman ng bala ang tumama sa likod ng misis nitong si Merriam Odicta.

Natamaan umano ang spinal column ni Merriam dahilan kung bakit agad itong binawian ng buhay.

Isasailalim naman sa ballistic examination ang slug na narekober sa katawan ni Melvin upang matukoy kung anong baril ang ginamit ng salarin.

Ayon sa mga pulis posibli kasama ng mag-asawa sa barko ang suspect at malapitan lang ang mga ito ng pagbabarilin.

Si Merriam at Melvin ang umano’y kilalang drug lord na nag-ooperate ng illegal drugs sa Western Visayas.

Kabilang din sila sa listahan drug watchlist ng PDEA 6.

Sa ngayon wala pang tiyak na ulat ang PRO6 kung ilang porsiyento ang ibinaba sa bentahan ng droga sa Iloilo ngayong napatay na ang tinutukoy na drug lord sa rehiyon.

Bandang alas singko kagabi ng dumating ang mga labi ng mag-asawang odicta sa bahay nito sa Jaro, Iloilo City.

Panawagan ng kaanak ng magasawa na mabigyan kaagad ng hustisya ang pagkamatay ng kanilang mahal sa buhay.

(Lalaine Moreno / UNTV Correspondent)

Tags: pagkamatay ng mag-asawang Odicta, PNP, Special task force na mag-iimbestiga