Inireklamo ng matinding pagbabanta ni Labor Undersecretary Jacinto Paras sa Pasay City prosecutors office si Senator Antonio Trillanes IV.
Sa anim na pahinang reklamo ni Paras, nakasaad na nangyari ang insidente noong ika-29 ng Mayo sa mismong session hall ng Senado.
Ayon kay Usec. Paras, sa araw na iyon nagkaharap at kinompronta umano siya ni Trillanes.
Naniniwala si Paras na ang isinampa nilang inciting to sedition case noong nakaraang taon ang ugat ng pag-iinit ng ulo ng senador.
Ang kaso ay bunsod ng privilege speech ni Trillanes noong Oktubre 2017 na umano’y humihikayat sa militar na patayin si Pangulong Duterte.
Muling pinabulaanan naman ng mambabatas ang mga paratang ni Paras.
( Nel Maribojoc / UNTV Correspondent )
