Kinumpirma ni Senator Miriam Defensor Santiago na nagkakaroon na sila ng unawaan ni Senator Bongbong Marcos kaugnay ng posibleng pagtatambal para sa darating na halalan.
Ito ang inihayag ni Senator Santiago pagkatapos ng awarding ceremony ng philippine judges association sa Pasay city kaninang umaga.
Isa ang senadora sa hall of fame awardee ng organisasyon ng mga hukom sa Pilipinas.
Si Santiago ay nagdeklara na tatakbo bilang pangulo sa darating 2016 national elections.
Samantang si Senator Bongbong Marcos naman ay sasabak sa vice presidential race.(Nel Maribojoc/UNTV Correspondent)
Aminado si presumptive Vice President Sara Duterte-Carpio na naiilang siyang pangunahan ang paghahanda para sa gagawing transition sa pagpasok ng bagong administrasyon dahil hindi pa sya ganap na naipoproklama bilang bagong bise presidente ng bansa.
Sa kanyang special hour live stream kahapon (May 16) sa kanyang facebook page, sinabi ni Mayor Inday Sara na wala siyang irerekomenda na sinomang personalidad para makasama sa bubuoing gabinete ni presumptive President Bongbong Marcos, Jr.
Sinabi nito na tiwala sya sa kung sino man ang itatalaga ni BBM, at kasama umano sa tiyak na ikokonsidera nito ay kung sino-sino ang may kakayahan na ipagpatuloy ang mga napasimulan na ng Duterte administration.
Samantala inilahad rin ni Mayor Sara na kasama sa kanyang mga plano ang pagpapatayo ng vice president satellite offices sa iba’t ibang lugar sa bansa.
Layon nito na mas mailapit pa sa mga komunidad ang tanggapan ni bise presidente kung saan maaring idulog ng ating mga kababayan ang kanilang mga pangangailangan.
Ayon sa presumptive VP, may mga nais itong gawing proyekto sa ilalim ng office of the vice president, na bukod sa mga programa na kanyang gagawin sa Department of Education.
Samantala, sinagot rin nito ang mga tumutuligsa sa pagkakatalaga sa kanya bilang susunod na kalihim ng Department of Education na iniuugnay sa usapin ng mandatory ROTC.
Diretsung sinagot ni Duterte-Carpio na walang koneksyon sa basic education ang ROTC.
“Walay koneksyon po… with regard to ROTC and Department of Education. Remind lang ko sa tanan mga bright that the Department of Education is all about basic education plus ALS it has nothing to do with ROTC,” phayag ni Mayor Sara Duterte sa kanyang FB live show.
Ayon kay duterte-carpio, hihintayin na muna nito ang proklamasyon bago niya idetalye ang mga plano niya sa Education Department.
Pero una na niyang sinabi na sangayon siya na ibalik na ng tuluyan ang face-to-face classes para normal nang makapagaral ang mga estudyante.
Janice Ingente | UNTV News
Nakatakda ngayong hapon sa Malacañang ang conferment o paggagawad ng Quezon Service Cross sa dating senador na si Miriam Defensor Santiago.
Si Pangulong Rodrigo Duterte ang mismong mangunguna rito.
Ang Quezon Service Cross o Medalyang Quezon ayon sa Official Gazette ng Philippine Government ang pinakamataas na parangal ng Republika para sa isang indibidwal para sa paglilingkod-bayan.
Ang Pangulo mismo ng bansa ang nagbibigay ng nominasyon at kailangang aprubahan ng Kongreso kaya itinuturing na natatanging parangal ang Quezon Service Cross.
Ni-nominate ni Pangulong Duterte ang namapayang senador noong nakalipas na taon para sa naturang award matapos na maghain ng resolusyon sina Senador Grace Poe at Sonny Angara hinggil dito.
Mula nang pasimulan ang Quezon Service Cross noong 1946, limang tao pa lang ang nagawaran nito.
Ang mga dating Pangulo na sina Carlos Romulo, Emilio Aguinaldo, Ramon Magsaysay, Benigno Aquino Jr. at ang pinakahuli ay ang dating Interior Secretary Jesse Robredo.
Si Santiago ay limang dekadang nanilbihan bilang public servant.
Taong 2016 nang muli itong tumakbo sa pagkapangulo subalit natalo kay Pangulong Duterte.
Bago maging pulitiko, naging presiding judge ito sa Quezon City Regional Trial Court, Immigration commissioner at kalihim ng Agrarian Reform.
Pumanaw si Santiago noong Setyembre 2017 dahil sa lung cancer.
( Rosalie Coz / UNTV Correspondent )
Ayaw ng Korte Suprema na talakayin pa sa publiko ang merito ng protesta ni dating Senador Bongbong Marcos sa pagkapanalo ni Vice President Leni Robredo.
Kayat inatasan ng SC na tumatayong Presidential Electoral Tribunal ang kampo nina Marcos at Robredo na sundin ang sub judice rule.
Ibig sabihin, inatasan ng PET sina Marcos at Robredo na iwasan nang pag-usapan sa publiko kung ano ang pwedeng kahinatnan ng kaso. Ito ay dahil malapit nang magsimula ang pilot recount sa mga lalawigan ng Camarines Sur, Iloilo at Negros Oriental sa susunod na buwan.
Ayon sa abogado ni Marcos na si Atty. Vic Rodriguez, paalala ito ng korte sa mga partido na iwasang magkomento sa kaso upang mahatulan ito ng ayon lamang sa ebidensiya.
Pero hindi naman aniya bawal ang patas at eksaktong pagbabalita ng mga nangyayari sa korte patungkol dito.
Bago ito ay ilang beses ding tinalakay ng kampo nina Marcos at Robredo ang mga isyu kaugnay ng protesta. Nagkapalitan din ng akusasyon kung sino ang nagpapatagal sa proseso.
Naghain pa ng mosyon ang kampo ni Robredo upang bawiin ang lahat nilang mosyon na maaaring makasagabal sa mano-manong bilangan. Pero ayon sa PET, walang nakabinbing mosyon si Robredo na maaaring makaantala sa isasagawang manual recount.
Pinasasagot naman ng tribunal ang kampo ni Marcos sa loob ng sampung araw kung babawiin din nito ang lahat niyang mosyon gaya ng ginawa ni Robredo. Pero ayon sa abogado ni Marcos, wala naman silang mosyon na kailangang bawiin.
Samantala, wala pang sagot tungkol dito ang kampo ni Robredo.
( Roderic Mendoza / UNTV Correspondent )
Tags: Korte Suprema, Robredo, Sen. Bongbong Marcos
