Puspusan na ang kampanya ng Philippine National Police laban sa operasyon ng iligal na sugal sa bansa kasunod ng paglalabas ng Executive Order No.13 ni Pangulong Rodrigi Duterte noong isang linggo.
Bunsod nito ay nagdeklara na si PNP Chief PDG Ronald “Bato” Dela Rosa ng all-out war laban sa online gambling at jueteng.
Tulad ng kanilang kampanya kontra droga, hindi rin anila palalampasin maging mga pulitiko at matataas na opisyal ng pnp na nakikinabang sa operasyon nito.
Inatasan na rin ni Gen. Dela Rosa ang mga regional director at ang Criminal Investigation and Detection Group na manguna sa pagsasagawa ng mga operasyon.
Sa ngayon ay may listahan na aniya sila ng mga pulis at personalidad na sangkot sa iligal na sugal kaya naman kumpiyansa silang mawawakasan nila ang problemang ito sa loob ng anim na buwan.
(Lea Ylagan / UNTV Correspondent)
