Hindi pa rin pinapangalanan ng Philippine National Police ang sinasabing utak o mastermind ng pagpapasabog sa Davao city.

Ngunit ayon kay PNP Chief Ronald ‘Bato’ Dela Rosa, may ideya na sila kung sino ang nasa likod ng pambobomba sa Davao city night market na ikinasawi ng labing apat na tao.

Dagdag pa ng hepe ng pambansang pulisya, ihahayag nila ang mastermind sa naganap na Davao city bombing sa oras na maaresto na nila ang suspek na umano’y nagtatago ngayon sa Central Mindanao na lugar ng mga armadong grupo.

Ayon pa kay Dela Rosa, habang tumatagal ang imbestigasyon ay lalong lumilinaw ang kaugnayan ng pagsabog sa Narco-politics.

Naniniwala ang mga otoridad na ganti ito ng mga pulitikong naapektuhan ng pinaigting na kampanya ng pamahalaan laban sa illegal drugs.

Samantala muli namang nakiusap ang Chief PNP sa publiko na huwag magkalat ng mga maling impormasyon na may kinalaman sa mga gawain ng terorismo.

(Sherwin Culubong / UNTV Correspondent)

Tags: may ideya na kung sino, nasa likod ng Davao city blast, PNP