Hinamon ni Philippine Drug Enforcement Agency Director General Arturo Cacdac si Lt. Col. Ferdinand Marcelino na ilabas ang laman ng kanyang cellular phone kung talagang wala siyang kinalaman sa operasyon ng shabu laboratory sa isang townhouse sa Sta. Cruz, Manila noong Enero.
Ang PNP Anti-Cybercrime Group naman na nagsagawa ng digital forensic examination sa mobile phone ni Marcelino, sinabing handa silang humarap sa korte kung kinakailangan upang ipakita ang laman nito
Sa kasalukuyan ay wala pa naman silang natatanggap na request mula sa Korte.
(Lea Ylagan / UNTV Correspondent)
Tags: Lt. Ferdinand Marcelino, nilalaman ng telepono, PNP-AIDG
Ipinagtanggol ni PNP Chief Director General Ronald Bato Dela Rosa ang bagong pwesto ni PSSupt. Albert Ferro bilang director ng PNP Drug Enforcement Group o PNP-DEG.
Nauna nang tinutulan ni Sen. Kiko Pangilinan ang pagbabalik kay Ferro sa pwesto na aniya’y hindi makatutulong para maibalik ang tiwala ng publiko sa PNP war on drugs.
Si Ferro ang dating pinuno ng PNP Anti-Illegal Drugs Group na binuwag matapos masangkot ang ilang tauhan nito sa pagdukot at pagpatay sa Korean businessman na si Jee Ick Joo. Subalit si Bato, buo pa rin ang tiwala kay Ferro.
Pagtatanggol pa ng heneral, walang kinalaman si Ferro sa pagkidnap at pagpatay sa Korean businessman na si Jee. Kailangan aniya ng PNP ang isang katulad ni Ferro na pinagkakatiwalaan na ng ating foreign counterparts.
( Lea Ylagan / UNTV Correspondent )
Tags: PNP Chief Dela Rosa, PNP DEG, PNP-AIDG
Hindi lusot sa kaso ang team leader ni SPO3 Ricky Sta. Isabel na si PSupt. Raphael Dumlao kahit sinasabi nitong nasa China siya nang dukutin ang negosyanteng Koreano na si Jee Ick Joo sa Angeles, Pampanga noong Oktubre 2016.
Ayon kay AIDG Director PSSupt. Albert Ferro, bukod sa impormasyong si Dumlao ang nagrekomenda sa AIDG, siya rin umano ang nag-utos kay Sta. Isabel na magtungo sa Angeles upang maghanap ng uupahang bahay na gagawing safehouse ng mga tauhan ng AIDG kapag may operasyon.
Kailangan din aniyang imbestigahan ang lumalabas na balita na si Dumlao din ang nag-utos sa dalawa pang tauhan ng AIDG upang tulungan si Sta. Isabel sa isinasagawang operasyon sa Angeles.
Kaya naman sa kasalukuyan ay nakarestrictive custody na rin aniya sa AIDG si Dumlao para sa isinasagawa nilang imbestigasyon.
Kinumpirma din ni Ferro na nagbigay na ng affidavit sa anti-kidnapping group ang dalawang pulis na sina SPO4 Roy Villegas at PO2 Christopher Baldomino na nadawit din sa kaso kasama ni Sta. Isabel.
Kaugnay nito, tiniyak naman ni Ferro na buo ang kooperasyon nila sa imbestigasyon ng anti-kidnapping group at National Bureau of Investigation upang malinawan at malutas ang kaso ng pagdukot at pagpatay kay Joo.
Base sa mga imbestigasyon, sinabi ni AIDG Director PSSupt. Albert Ferro na nagamit ang AIDG sa modus operandi ni SPO3 Ricky Sta. Isabel at ng iba pa nitong kasabwat.
(Lea Ylagan / UNTV Correspondent)
Tags: hindi ligtas sa kaso, PNP-AIDG, Team leader ni SPO3 Ricky Sta. Isabel
Hanggang sa kasalukuyan ay hindi pa rin ibinabalik o ipinipresinta ng Armed Forces of the Philippines sa korte ang sumukong si Lt. Col. Ferdinand Marcelino.
Ito’y kahit na noong isang araw pa ito hawak ng provost marshall.
Ayon kay AIDG Legal and Investigation Division Chief PSupt. Enrico Rigor, kung gugustuhin ng korte ay maaaring kasuhan ng obstruction of justice at contempt ang AFP sa di pagsusuko sa isang wanted na may warrant of arrest lalo na kung matatapos ang sampung araw na itinakda ng batas.
Sinabi pa ni Rigor na malabo ding aprubahan ngayon ng korte ang hiling ng AFP na kunin ang custody ni Marcelino dahil hindi pa nila ibinabalik ang warrant sa issuing court.
Kaya naman, sa Manila City Jail ito nakatakdang ikulong base na rin sa kautusan ng korte at hindi sa AFP Custodial Center gaya ng nais ng AFP.
Wala rin aniyang law enforcement power ang AFP tulad ng PNP, NBI at PDEA.
Dagdag pa ng opisyal, kung tutuusin, mas tama ang prosesong ginawa ng chinese na si Yan Yi Shou nang sumuko ito kahapon sa National Bureau of Investigation na may law enforcement function.
Matatandaang nahuli sina Marcelino at Yan Yi Shou sa celadon residences sa Sta. Cruz, Manila na ginawang shabu laboratory, madaling araw ng Jan. 21 kung saan nakuha ang mahigit sa 380 milyong pisong halaga shabu.
(Rosalie Coz / UNTV Correspondent)
Tags: AFP, maaaring kasuhan kung hindi isusuko si Lt. Col. Marcelino sa korte, PNP-AIDG
