Bigo ang mga tauhan ng Cebu City Police Office na mahanap ang negosyanteng si Peter Lim sa dalawa nitong bahay sa lalawigan. Dala-dala ang kopya ng warrant of arrest para sa mga kasong paglabag sa Comprehensive Dangerous Drugs act of 2002.
Unang tinungo ng mga pulis ang bahay nito sa Barangay Kasambagan ngunit ayon sa kasambahay, hindi umano niya nakikita roon si Lim sa loob ng sampung taon niyang paninilbihan.
Sumunod namang pinuntahan ng mga ito ang isa pang bahay ng negosyante sa Barangay Banilad, pero ayon sa katiwala ay matagal na itong hindi umuuwi doon.
Sa kabila nito, tiniyak ng Cebu police na patuloy nilang hahanapin ang negosyante na batay sa kanilang intelligence report ay nasa lalawigan pa rin upang maisilbi ang arrest warrant laban dito.
Magsusumite rin aniya sila ng report sa Makati City RTC Branch 35 na siyang may hawak sa kaso kaugnay sa nabigong pagserve ng warrant sa Cebu-based businessman.
( Gladys Toabi / UNTV Correspondent )
