Nagdodoble ingat ngayon ang Philippine Children’s Medical Center (PCMC) matapos tamaan ng severe dengue ang limang doktor doon at masawi ang isa noong nakaraang linggo, ika-19 ng Setyembre. Inihayag din ng pamunuan ng PCMC ang pakikiramay sa kanilang kasamahang namatay dahil sa severe dengue.
Buwan ng Agosto ngayong taon, nakapagtala ng 214 na admitted dengue cases ang ospital. May limang bagong kaso ngayong Setyembre at sa kabuoan ay umabot na ito sa 92.
Sa assessment ng PCMC, ang vector mosquito na may dalang dengue ay nasa loob lamang ng PCMC.
Ayon kay PCMC Spokesperson Dra. Sonia Gonzales, saludo sila sa dedikasyon at sakripisyo ng kanilang mga kasamang doktor at medical specialists na nagsisilbing frontliners upang magamot ang mga pasyenteng may sakit at masugpo ang pagkalat ng anomang uri ng nakakahawang sakit.
Kinumpirma naman ng DOH ang ulat at nagbigay na rin aniya ng kautusan ang pamunuan ng ospital sa mga empleyado ng PCMC na mag-apply ng insect repellant sa katawan upang makaiwas sa dengue transmission.
Ayon pa kay Usec. Domingo, peak season ngayon ang pagdami ng dengue cases lalo na’t katatapos lang ng Bagyong Ompong at may pag-ulan rin sa iba pang bahagi ng bansa.
Pinapalalahanan ang publiko na maging maingat at sundin ang 4’s strategy ng kagawaran upang masugpo rin ang pagkakaroon ng dengue outbreak. Kadalasan sa mga nagkakaroon ng dengue sa Pilipinas ay mga kabataang nasa edad 10 hanggang 14 na taong gulang.
Batay sa datos ng DOH, simula ika-1 ng Enero hanggang ika-1 ng Setyembre ngayong 2018, mayroong 100,225 nang naitalang kaso sa bansa.
Mas mataas ito ng 6% kumpara sa mahigit 94, 000 noong 2017. Pangatlo ang National Capital Region (NCR) sa limang rehiyon na may pinakamataas na kaso ng dengue ngayong 2018.
( Aiko Miguel / UNTV Correspondent )
Tags: dengue, dengue outbreak, PCMC
METRO MANILA – Nakapagtala ang Pilipinas ng mahigit sa 72,000 kaso ng dengue sa bansa sa unang 6 na buwan ng taong 2023.
Batay sa datos ng Epidemiology Bureau ng Department of Health (DOH), mula Enero 1 hanggang Hunyo 17, 2023 lamang ay nasa 72,333 ang dengue cases na kanilang naitala sa bansa.
Ayon sa DOH, nasa 249 naman ang kumpirmadong nasawi dahil sa dengue.
Nabatid na pinakamarami pa ring dengue cases ang naitala sa National Capital Region (NCR).
METRO MANILA – Mahigit 100% na, na mas mataas ang mga kaso ng dengue sa Pilipinas, mula January 1 – July 16 ngayong taon, kumpara sa kaparehong panahon noong nakaraang taon.
Sa tala ng Department of Health umabot na sa 40,096 ang dengue cases as of July 16, 2022. 106% na mas mataas kaysa noong 2021.
319 na ang mga namatay dahil sa nasabing sakit ngayong taon, na katumbas ng 0.4% ng kabuoang bilang ng mga 2022 dengue cases.
Ayon sa DOH, karamihan sa mga kaso ay naitala sa Central Luzon, sinundan ng Eastern Visayas, at National Capital Region (NCR).
Dahil dito patuloy ang panawagan ng kagawaran sa publiko na sundin ang 4S strategy kontra dengue.
Kabilang na rito ang Search and destroy o pagpuksa sa mga pinamumugaran ng lamok;
Seek early consultation o agarang pagpapakonsulta sa unang paglitaw pa lang ng sintomas ng dengue;
Self protection measures gaya ng pagsuot ng damit na may mahahabang manggas. At support spraying o fogging.
Tiniyak naman ng kagawaran, na may dengue fast lane ang mga ospital at klinika sa bansa para sa mabilis na pag-diagnose at pagtugon sa dengue cases.
Naglabas ng Memorandum Order ang Department of the Interior and Local Government (DILG) na humihikayat sa mga barangay official ng Antique na paigtingin ang pagpapatupad ng Aksyon Barangay Kontra Dengue sa lugar tuwing alas-4 ng hapon kaalinsabay sa pagdiriwang ng Dengue Awareness Month ngayong buwan ng Hunyo.
Nanawagan si Pamela Socorro Azucena, Pangulo ng Liga ng mga Barangay sa probinsya ng Antique, na gawing habit ang paglilinis ng paligid kasama na ang mga bakuran upang hindi dumami ang mga lamok na nagdadala ng sakit na dengue.
Bukod dito, nangangailangan din na magsagawa ang mga barangay captain ng house-to-house at mobile information drives sa kani-kanilang mga barangay upang maisulong ang prevention awareness sa lalawigan.
Samantala, may naiulat na 7 kaso ng dengue sa Brgy. Idio, Sebaste sa kabila ng paglilinis sa paligid ayon sa nagsisilbing kapitana na si Azucena.
Sa kasalukuyan, nakikipag-ugnayan si Azucena sa Department of Public Works and Highways (DPWH) upang suriin ang status ng kanilang box culvert, kung saan pinaniniwalaang may mga stagnant water na nagsisilbing breeding ground ng mga lamok na may dalang dengue.
Ani naman ni DILG Antique provincial direct Cherryl Tacda na ang cleanliness drive ay hindi lamang responsibilidad ng mga kawani ng barangay, kundi lahat ng tao sa komunidad ay dapat makibahagi rito gayong maaaring magkaroon ng dengue ang sinoman.
Sa kabuuan, mayroong 777 kaso ng dengue at 4 ang nasawi mula Enero 1 hanggang Hunyo 11 ngayong taon sa lalawigan ng Antique ayon sa pinakahuling na ulat mula sa Integrated Provincial Health Office.
(Zy Cabiles | La Verdad Correspondent)
