Pinabulaanan ng AFP ang mga pahayag na hindi prayoridad ng kasalukuyang Chief of Staff Gen. Hernando Iriberri ang isyu tungkol sa West Philippine Sea.

Ayon kay AFP Chief Public Affairs Office LT. Col. Noel Detoyato, hindi totoo na mas inuunang asikasuhin ni Gen. Iriberri ang internal security threats.

Lumabas ang pahayag ng AFP matapos sabihin ng dating National Security Adviser at mambabatas na si Roilo Golez na dismayado ito sa naging pagtugon ng heneral sa isyu ng reclamation activities ng China sa West Philippine Sea.

Ayon kay Golez, ito ang pinakamalaking bantang kinakaharap ng bansa sa ngayon.

Dagdag pa nito, hindi competent si Gen. Iriberri nang mas paboran nito ang procurement ng mga force protection equipment kaysa modern military hardware tulad ng shore-based missile system na magagamit na-depensa laban sa anumang bantang panglabas sa bansa.

Kaugnay nito, ipinakiusap ni Gen. Iriberri sa Department of National Defense na mailipat sa second horizon o ikalawang bahagi ng AFP Modernization Program mula 2018 hanggang 2022 ang shore-based missile system project proposal upang mabigyang-daan ang pagbili ng mga kagamitan tulad ng armas, body armor at helmet para sa mga sundalong na sa larangan ng labanan.

Ayon sa Heneral, dumarami ang casualties sa hanay ng mga militar dahil lamang sa improvised explosive devise na ginagamit ng mga kalabang rebelde, bandido, at terorista kaya inuna ang mga armas, body armor at helmet kesa sa shore-based missile system project proposal. (Rosalie Coz / UNTV News)

Tags: AFP Chief Public Affairs Office LT. Col. Noel Detoyato, Chief of Staff Gen. Hernando Iriberri