Pangulong Duterte, nawalan ng tiwala kaya tinanggal sa pwesto ang Pangulo at CEO ng PNOC-Exploration Corp. – Malacañang

by Erika Endraca | October 16, 2019 (Wednesday) | 2506

METRO MANILA, Philippines – Nawalan ng tiwala si Pangulong Rodrigo Duterte sa Presidente at Chief Executive Officer ng Philippine National Oil Company- Exploration Corporation (PNOC-EC) na si Atty. Pedro Aquino Jr. Kaya pinagsumite ito ng resignation ayon sa Malacañang.

Batay sa pahayag ni Presidential Spokesperson at Chief Presidential Legal Counsel Salvador Panelo, ang order ng Pangulo ay naaayon pa rin sa anti-corruption campaign ng pamahalaan at binigyang-diin na walang sasantuhin sa
ilalim ng administrasyon.

Muling binigyang-diin ng palasyo na ang direktiba ng Pangulo sa lahat ng opisyal at kawani ng pamahalaan na magtrabaho ng naaayon sa batas at umiwas na gumawa ng anumang iregularidad at di ligal na maaaring ikaalis sa pwesto.

Walang ibang detalyeng inilabas ang Malacañang pero batay sa mga ulat, ang pagkakaalis sa pwesto ni Aquino ay nag-ugat dahil sa kasunduang pinasok nito sa isang russian firm na di dumaan sa pag-apruba ng board at wala ring approval ni Energy Secretary Alfonso Cusi.

(Rosalie Coz | UNTV News)

Tags:

Pormal nang inendorso ng partido ni Pang. Duterte na PDP-Laban ang kandidatura ni BBM

by Radyo La Verdad | March 24, 2022 (Thursday) | 42594

Pormal nang inendorso ng partido ni Pangulong Rodrigo Duterte na PDP-Laban ang kandidatura ni Ferdinand Bongbong Marcos, Jr.

Ayon kay PDP-Laban President at Energy Secretary Alfonso Cusi, ito ang naging desisyon ng National Executive Committee ng partido at dumaan ito sa mga konsultasyon.

“’Yun po nagsama sama kami to make formal announcement today that we endorsing the candidacy of Bongbong Marcos for President. At ito po ay hindi desisyon ng partido where we went to the process based on our constitution and bylaws,” ani Sec. Alfonso Cusi, President, PDP-Laban Cusi Wing.

Ayon sa party officials, sa lahat ng presidential candidates, si Marcos Junior ang nakita nila na maaaring makapagtuloy ng mga programa at repormang nasimulan ni Pangulong Rodrigo Duterte.

“Ang ibig sabihin lang po nito sa mga pinagpilian po, ang pinakamalapit po na magtutuloy at magtutulak ng proyekto ni Pangulong Duterte ay si dating Senador Bongbong Marcos,” ayon kay Sec. Melvin Matibag, Acting Cabinet Secretary / Secretary General, PDP-Laban party (Cusi Wing).

Sa tanong naman kung ang endorso na ito ng partido ay endorso na rin ni Pangulong Duterte kay Marcos Jr., sagot ni Cusi,

“The President is now focus in addressing on the concern of the country, sabi niya trabaho siya on the last day of his office, pinababayaan na natin siya nakatutok siya sa trabaho, in due time he will speak as Mayor Duterte.”

Ayon kay Acting Presidential Spokesman Martin Andanar, mas mabuting hintayin ang magiging posisyon ni Pangulong Duterte sa naging desisyon ng kaniyang mga kapartido.

“Hintayin na lang po natin si Pangulong Duterte kung ano ang kaniyang personal na desisyon at again yung desisyon na yun ng PDP-Laban ay base sa kanilang napagusapan sa partido,” pahayag ni Acting Presidential Spokesman Martin Andanar.

Nagpasalamat naman ang kampo ni Marcos Jr. sa endorso na ito ng ruling party.

Ayon kay Attorney Vic Rodriguez, ang tiwalang ibinigay kay BBM ay nakapagbibigay sa kanila ng inspirasyon, at indikasyon aniya na nagkakaroon ng epekto ang kanilang panawagan na pagkakaisa.

Binatikos naman ni Senator Koko Pimentel, chairman ng PDP-Laban Pacquiao group ang aksyon na ito ng grupo nila Secretary Cusi.

Ayon sa Senador, manipestasyon ito na total strangers ang grupo ni Cusi sa PDP-Laban. Hindi aniya nila kinikilala na ang partido ay itinatag para labanan ang Marcos dictatorship.

Hindi na pinatulan pa ni Cusi ang naging pahayag na ito ni Senator Pimentel.

Nel Maribojoc | UNTV News

Tags: , ,

Anti-Terrorism Bill, nirerepaso pa ng legal team ni Pangulong Duterte

by Erika Endraca | June 23, 2020 (Tuesday) | 66430

METRO MANILA – Wala pang aksyon si Pangulong Rodrigo Duterte sa kontrobersyal na Anti-Terrorism Bill.

Aniya, kasalukuyan pa itong nirerepaso ng kaniyang legal team.

Marami ang tutol na maisabatas ang panukala dahil sa anila’y mga probisyon nitong labag sa karapatang-pantao.

“My legal is still reviewing it, my legal team sa Malacanang, hindi ko pa natanggap, I had it reviewed. It’s always automatic, pagdaan sa akin, I endorse it to legal without even reading it actually, if you really want to know. It’s legal who will return it to me with a recommendation, by there, I will approve it or not. ” ani Pangulong Rodrigo Duterte.

Samantala, para naman sa Pangulo, ang pangunahing banta ng terorismo sa bansa ay ang mga rebeldeng komunista.

Tinuligsa rin ng Punong Ehekutibo ang pag-atake ng mga tauhan ng new people’s army sa mga pwersa ng pamahalaang may bitbit ng ayudang para sa mga apektado ng pandemiya.

“Terrorism is number one in our list. Actually the number one threat to the country hindi abu sayyaf, hindi ‘yung mga terorista of no value. Itong high value targets ito ‘yung mga komunista. Kaya ang utos ko talaga sa armed forces, sa sundalo, upakan mo, upakan mo.” ani Pangulong Rodrigo Duterte.

Inihayag din ng Punong Ehekutibo ang plano nitong paglilibot sa bansa para dumalaw sa mga kampo ng militar.

Aminado naman ang Pangulong kailangan niyang mag-ingat sa paglabas dahil nananatili ang banta ng COVID-19.

“Ako ‘yung ayaw talaga sa itong lockdown-lockdown. I hate it. pero ang sabi ko sa inyo, kung kayo hindi makatiis at tinamaan kayo, sorry na lang. Same is true for me. If I’m reckless enough, then I’d get it because in the coming days I intend to go around the country. Magbisita ako. Magbisita pa ako ng kampo ng mga military. So i’ll just have to take precautions. .”ani Pangulong Rodrigo Duterte.

( Rosalie Coz | UNTV News )

Tags: ,

Pres. Duterte, umaaasang maganda ang kahihinatnan ng pagsali ng Pilipinas sa COVID-19 clinical trials

by Erika Endraca | May 25, 2020 (Monday) | 62669

METRO MANILA – Positibo ang pananaw ni Pangulong Rodrigo Duterte sa isasagawang clinical trials para sa potential vaccines kung saan lalahok ang Pilipinas.

Ayon kay Presidential Spokesperson Secretary Harry Roque, malaki ang interes ng pangulo sa usaping ito.

Sa huling quarter ng 2020 inaasahang makikibahagi ang Pilipinas sa clinical trials sa pangunguna ng Department Of Science and Technology (DOST).

Ang DOST din ang magdedetermina kung saan isasagawa ang clinical trials at kung sino ang kabilang na local institutions at pinoy researchers .

Kabilang naman sa collaborating organizations kung saan makikipagtulungan ang Pilipinas ay ang Adimmune Corporation, Academia Sinica, Chinese Academy Of Science- Guangzhou Institute of Biomedicine and Health at Sinopharma – Wuhan Institute of Biological Products and Beijing Institute.

Oras na maisagawa ang clinical trials, kabilang ito sa magiging requirements para sa registration process ng vaccine sa FDA at pagkuha ng certificate of registration para naman sa paglalabas ng bakuna sa merkado ng bansa.

Una nang sumali ang Pilipinas sa clinical trials ng WHO, na kinabibilangan ng testing sa off-label drugs na nagpakita ng senyales na epektibo ito laban sa COVID-19.

Samantala, pag-aaralan naman ni Pangulong Duterte ang rekomendasyon ng DOST na makapagtayo ng RESEARCH CENTERS para sa Local Vaccine Research Development.

Kabilang na ang Virology Science and Technology Institute sa New Clark City, Tarlac at ang reactivation ng Pharmaceutical Development Unit sa DOST- Industrial Technology Development Institute.

(Rosalie Coz | UNTV News)

Tags: , ,

More News