Walang Pilipinong nadamay sa nangyaring pag-atake sa Liege, Belgium kahapon ayon sa Department of Foreign Affairs (DFA).
Sa ulat ng embahada ng Pilipinas sa Belgium kay Foreign Affairs Secretary Alan Peter Cayetano, walang Pilipinong kabilang sa tatlong nasawi sa insidente.
Batay sa ulat ni Ambassador Eduardo Jose De Vega, inatake ng isang lalake na may dalang kutsilyo ang dalawang babaeng pulis.
Gamit ang baril ng mga pulis, binaril naman nito ang isang lalaki na nasa loob ng kaniyang sasakyan. Hinostage din nito ang isang babae, pero napatay ang suspek ng mga rumespondeng pulis.
Nagpaabot na ng pakikiramay ang Pilipinas sa Belgium kaugnay sa insidente na pinaniniwalaan ng Belgian authorities na posibleng isang terror attack.
Walong libong Pilipino ang nasa Belgium at isang daan dito ang naninirahan sa Liege.
