Inatasan na ng Department of Transportation and Communication ang lahat ng mga ahensya nito na umpisahan na ang Oplan Ligtas biyahe kaugnay ng paparating na Undas.
Gagawing 24/7 ang operasyon ng mga action center upang makatulong sa mga magkaka-problemang motorista at pasahero na uuwi sa kanilang mga probinsiya sa Undas.
Magdadagdag ng mga security personnel at magdedeploy ng mga K9 unit ang DOTC sa mga bus terminal, airport at pantalan, kabilang na ang mga first aid counter at charging station para sa mga pasahero.
Ang LTFRB at LTO nagsimula na ring magsagawa ng inspeksyon sa mga bus terminal, maglalabas rin ng special permits ang ahensya upang matugunan ang dami ng mga pasaherong uuwi sa mga probinsya ngayong weekend.
Sa kasalukuyan mayroon ng 960 na mga bus ang nag apply para sa special permits upang makabiyahe papasok at palabas ng Metro Manila simula sa biyernes.
Magsasagawa ng random drug testing ang LTFRB sa mga pub driver alinsunod sa anti drunk and drugged driving act upang maiwasan ang aksidente sa daan na kadalasang kinasasangkutan ng mga lasing na driver.
Mahigpit namang ipatutupad sa mga paliparan ang air passenger bill of rights.
Inatasan na ng DOTC ang mga airline company na mag dagdag ng mga tauhan sa mga check in counters upang maiwasan ang mahabang pila ng mga pasahero, mayroon ding mga help desk sa mga airport.
Magkakaroon naman ng regular na operasyon ang LRT, MRT at PNR sa darating na long holiday.
Ang Maritime Industry Authority o MARINA at Philippine Coast Guard ay magsasagawa ng sea worthiness check para sa mga barkong maglalayag ngayong Undas.
Para sa mga sumbong at reklamo maaaring tumawag sa mga DOTC hotline number 7890.(Mon Jocson/UNTV Correspondent)
Tags: DOTC, Oplan Ligtas, Undas
Nakahanda na ang Philippine National Police (PNP) sa ipatutupad na seguridad ngayong darating na undas.
Ayon kay PNP Chief PDG Oscar Albayalde, mahigit 32,000 pulis ang kanilang ipapakalat sa mahigit apat na libong sementeryo sa buong bansa.
Ito ay upang mabigyang proteksyon ang labing apat na milyong Pilipino na inaasahang dadagsa sa mga sementeryo. Makakatulong din ng pulisya sa pagbabantay ang mga force multipliers mula sa mga lokal na pamahalaan, Civil Action Groups at Civilian Volunteer Organizations.
Ngunit paglilinaw ng PNP, wala silang namo- monitor na banta sa seguridad ng bansa ngayong undas.
Ipinaalala din ni Gen. Albayalde sa publiko na sumunod sa patakaran ng mga sementeryo at iwasang magdala ng mga ipinagbabawal na gamit.
Bukod aniya sa mga sementeryo, magbabantay din ang mga pulis sa mga bus terminal, train stations, airports at seaports upang masigurong ligtas ang mga uuwi sa kani-kanilang lalawigan.
Payo pa ni Chief PNP sa publiko, maging mapagmatyag at agad na i-report sa pulis kung may mapapansing kahina-hinalang kilos o inabandonang gamit.
( Lea Ylagan / UNTV Correspondent )
Nakitaan ng probable cause ni Ombdudsman Conchita Carpio Morales para sampahan ng kasong paglabag sa Anti-Graft and Corrupt Practices Act si dating Transportation and Communications Secretary Joseph Emilio Abaya at 16 na iba pa.
Ito’y kaugnay sa umano’y maanumalyang MRT3 maintenance contract na pinasok ng DOTC at Busan Joint Venture noong Enero 2016.
Base sa imbestigasyon ng special panel of investigators, pinaboran ng DOTC sa pagkuha nito bilang maintenance provider ang Busan Joint Venture samantalang hindi naman ito kuwalipikado.
Lumabas din sa ulat ng Commission on Audit (COA) na bigo ang DOTC na bigyan ang publiko ng ligtas at komportableng transport system kahit naideliver na ang 48 bagong bagon noong Agosto 2015 hanggang Enero 2017 na nagkakahalaga ng halos 3.8 bilyong piso.
Mahigit limang daang milyon na ang naibigay ng pamahalaan sa Dalian pero hindi pa rin napapatakbo ng maayos ang mga bagon.
Sa isang pahayag, sinabi naman ng abogado ni Abaya na ikinadismaya ng dating kalihim ang naging resolusyon ng Ombudsman sa kabila nang malinaw aniya na walang basehan ang sinampang reklamo ng DOTr.
Gayunman tiniyak din ng dating opisyal na handa syang harapin ang anomang kaso na isasampa laban sa kanya.
Samantala, hindi pa rin nakakakuha ng kopya ng desisyon ng Ombudsman ang BURI, subalit tiniyak ng mga ito na pag-aaralan nilang mabuti ang kanilang depensa sa kaso.
Isang holdaper ang napatay matapos umanong manlaban sa mga pulis ng aarestuhin ito sa kanyang tahanan sa Bulacan. Patay ang isang notorious na holdaper matapos manlaban sa mga pulis kahapon ng umaga sa barangay Sto. Niño, Hagonoy Bulacan.
Kinilala ito na si Ricardo Viray alyas Buwaya, aarestuhin sana ng mga otoridad sa kanyang bahay dahil sa pagkakasangkot umano sa insidente ng robbery-holdup sa bayan ng Malolos noong Lunes ng umaga.
Ayon kay Malolos Chief of Police, Police Superintendent Heryl Bruno, pinasok ni Viray, kasama ang dalawang iba pa ang isang tindahan ng baterya ng sasakyan sa Barangay Longos.
Tinangay umano nito ang sampung libong piso na laman ng kaha maging ang isang dvd player, isang cellphone at walong baterya ng motorsiklo na tinatayang nagkakahalaga naman ng mahigit labing dalawang libong piso.
Ayon sa mga pulis, sangkot din si Viray sa ilang insidente ng robbery -holdup sa bayan ng Malolos, Calumpit, Hagonoy, Bulakan-Bulacan at Guiguinto. Dati na rin itong na-involve sa operasyon ng iligal na droga sa Hagonoy.
Samantala, hawak na ng PNP ang kuha ng CCTV camera sa tindahan ng baterya ng sasakyan at anomang araw ay posibleng mahuli na rin ang dalawa pang kasama ni Viray.
( Nestor Torres / UNTV Correspondent )
