Inilipat na sa Camp Bagong Diwa ang negosyanteng si Arnold Padilla matapos ma-discharge sa hospital kagabi. Labing isang araw na-confine sa St. Lukes Hospital si Padilla bago inilipat sa PNP General Hospital noong linggo.
Kagabi, idinischarged na si Padilla ng ospital at inilipat sa Camp Bagong Diwa sa Taguig City kung saan ito ikukulong.
Si Padilla ay inaresto sa kaniyang bahay sa Makati City noong ika-24 ng Agosto sa bisa ng search warrant kung saan nakuhanan ito ng mga baril at granada.
Ngunit sa halip na sa kulungan, sa ospital ito idiniretso dahil sa iniindang hindi stable na blood pressure. Kaya pakiusap ng kaniyang abogado, sana ay manatili muna sa ospital ang kaniyang kliyente.
Ngunit ang PNP, duda sa kalusugan ni Padilla. Ito ay matapos may nakita umano ang mga bantay nitong pulis na pasekretong iniluwa ni Padilla bago ilabas ng ospital kagabi.
Sa ngayon ay patuloy na minomonitor ng PNP ang kalagayan ni Padilla. Sakaling maging mabuti na ang kalagayan nito ay ikukulong na siya sa selda kasama ng ibang mga bilanggo.
Si Padilla ay naging kontrobersyal matapos itong magviral sa social media matapos mangbully umano ng traffic law enforcers.
Tags: Arnold Padilla, Camp Bagong Diwa, PNP General Hospital
