Nagpakita ng pwersa kanina ang mga samahan ng tsuper at operator sa Pampanga sa City of San Fernando, ito at upang mariing tutulan ang programa ng pamahalaan gawing moderno mga lumang public utility jeepneys.
Si Mang Jun na tatlumpung taon nang namamasada ay sumama sa tigil-pasada.
Aniya, malaking hamon sa kanila ang planong ito ng Department of Transportation dahil wala silang mapagkukunan ng pambili ng bagong unit ng jeep.
Para sa kanya, mas mainam na tulungan na sila ng pamahalaan na i-rehabilitate ang kanilang mga sasakyan kaysa tuluyan silang alisin sa kalsada.
Hindi gaya ng isinagawang transport strike kahapon ng grupo na mas madaming jeepney ang nakilahok sa tigil-pasada ngayong araw at naramdaman ito ng mga commuter.
Ayon sa NO to Jeepney Phase-out Coalition, umaabot sa sampung libong jeep ang nakilahok sa tigil-pasada.
Bilang ayuda sa mga commuter na naapektuhan ng transport strike, nagdeploy ang lokal na pamahalaan ng mga libreng sakay.
( Leslie Huidem / UNTV Correspondent )
METRO MANILA – Nagbanta ang transport group na Manibela na palalawigin nila ang isinagawang tigil-pasada noong nakaraang Linggo.
Ayon sa grupo, i-eextend nila ang nationwide transport strike hanggang ngayong Linggo kung patuloy anilang ipipilit ng pamahalaan ang deadline ng franchise consolidation para sa Public Utility Vehicle Modernization Program (PUVMP) sa December 31.
Nagtapos nitong Biyernes (November 24) ang 3 araw na tigil-pasada ng Manibela.
Sa pagtaya ng grupo, posibleng umabot sa 150,000 na mga jeepney driver at operators sa buong bansa ang inaasahang makikiisa sa planong extension ng tigil-pasada.
Sa kasalukuyan, wala pang inilalabas na panibagong opisyal na pahayag ang grupo ukol sa kanilang plano kung itutuloy ang extended transport strike.
Tags: Manibela, PUVMP, tigil-pasada
METRO MANILA – Magsasagawa ng 3 araw na tigil pasada ang grupong Pagkakaisa ng mga Samahan ng Tsuper at Operator Nationwide (PISTON) na magsisimula sa Lunes November 20.
Ito ay bilang pagtutol sa pag phase out sa mga traditional jeepney bunsod ng modernization program ng pamahalaan.
Giit ng grupo, ang dapat pagtuunan ng pansin ng pamahalaan ay kung paano mapapababa ang presyo ng produktong petrolyo, spare parts at iba pang nagpapahirap sa mga driver.
Paliwanag naman ng Land Transportation Franchising and Regulatory Board (LTFRB) makakabyahe parin ang mga traditional jeep basta sumailalim ito sa consolidation program at makabuo ng kooperatiba para mabigyan naman sila ng ruta.
Makikipag-ugnayan naman ang LTFRB sa iba pang ahensya ng pamahalaan para matiyak na may masaskyan pa rin ang mga commuter.
Tags: Piston, tigil-pasada
METRO MANILA – Ibinalik na ng Metropolitan Manila Development Authority (MMDA) ang pagpapatupad ng number coding scheme upang mabawasan ang traffic volume sa Metro Manila.
Itoý kahit na itutuloy pa rin ng mga transport group ang isinasagawang tigil-pasada kontra Public Utility Vehicle (PUV) modernization program.
Batay sa monitoring ng MMDA may ilang public transportation ang naipit sa traffic kahapon (March 6) at hindi kaagad nakabalik sa mga ruta. Kaya’t natagalang makasakay ang ilang mga pasahero.
Sa datos ng MMDA nasa 20% sa volume ng mga sasakyan sa Metro Manila ang nadagdag kahapon (March 6) dahil sa suspensyon ng number coding.
Sa ilalim ng expanded number coding scheme, ang mga sasakyang may license plates na nagtatapos sa 1 at 2 ay bawal bumiyahe tuwing Lunes, ang nagtatapos naman sa 3 at 4 ay bawal kada Martes, 5 at 6 tuwing Miyerkules, 7 at 8 tuwing Huwebes, at 9 at 0 ay bawal naman tuwing Biyernes. Ito’y mula 7:00 ng umaga hanggang 10:00 ng umaga at sa hapon naman ay mula 5:00 hanggang 8:00 ng gabi, maliban na lang kung holiday.
Kahapon (March 6) nakatanggap ang MMDA ng mga ulat kung saan mayroon umanong mga raliyista ang nanghaharang para kumbinsihin ang iba pang jeepney driver na sumama sa protesta.
Mayroon ding natanggap na report ang Quezon City na may mga naglalagay ng pako sa kalsada pa butasin umano ang mga gulong ng mga jeep na bumiyahe.
Pero ayon sa National Capital Region Police, sa kabila ng mga insidenteng ito, wala namang napaulat na nasaktan sa mga jeepney driver o sa mga pasahero.
Nagbabala naman si LTFRB Chairperson Assistant Secretary Teofilo Guadiz III na gagawan nila ang kaukulang aksyon ang mga nakilahok sa tigil-pasada.
(JP Nunez | UNTV News)
Tags: MMDA, tigil-pasada
