Tila malabo pa rin hanggang sa ngayon ang pagkamit ng hustisya para sa mga napatay na tauhan ng PNP-SAF dahil isang taon makalipas ang insidente, wala pa ring nakakasuhan sa mga suspek.
April 16, 2015
Abril nakaraang taon nang magsumite ng kanilang report sa insidente ang DOJ-NBI Special Investigation Team kay Sec. Leila de Lima.
Dito, syamnapung miyembro ng MILF, BIFF at private armies ang inirekomenda ng NBI na sampahan ng reklamo ng prosekusyon dahil sa pagpatay sa tatlumput limang miyembro ng PNP-SAF sa maisan ng Brgy. Tukanalipao, Mamasapano, Maguindanao noong January 25.
Isang testigo na itinago sa alyas “Marathon” na mismong nasa insidente ay kumilala sa mga nakasagupa ng PNP-SAF sa maisan ng Brgy. Tukanalipao.
Ipinagpatuloy ng DOJ atNBI ang imbestigasyon dahil wala pang nakukuhang testigo na makapagtuturo sa mga nakapatay sa siyam pang miyembro ng PNP-SAF malapit sa bahay ng teroristang si Marwan.
September 22, 2015
Anim na buwan pa ang lumipas bago nagpasya ang investigation team ng DOJ at NBI na sampahan na ng pormal na reklamo ang syamnapung suspek sa pagkamatay ng 35 tauhan ng PNP-SAF sa Brgy. Tukanalipao.
Kabilang sa mga ito ang labintatlong kumander ng MILF at anim na kumander ng BIFF.
Kasama rin sa mga inireklamo ang leader at tatlumput pitong tauhan ng private army ng mga Ampatuan na tinatawag na “massacre” dahil sangkot din umano ito sa Maguindanao massacre.
Nahaharap ang mga suspek sa reklamong direct assault with murder at theft dahil sa sadyang pagpatay sa mga tauhan ng SF at pagnanakaw sa kanilang mga gamit.
October 8, 2015
Bago naman bumaba sa pwesto si Sec. De lima noong oktubre, inilabas ang ikalawang bahagi ng report ng NBI at DOJ sa imbestigasyon sa insidente.
Sa pamamagitan nito ay tinapos ng DOJ at NBI ang kanilang imbestigasyon sa insidente.
November 27, 2015
Nobyembre na nang simulan ng DOJ ang preliminary investigation sa mga kaso.
Apat lamang sa mahigit syamnapung respondents ang tumugon sa imbestigasyon ng DOJ.
Kabilang dito sina Pendatun Utek Makakua at Lakiman dawaling na umano’y mga kumander ng MILF.
Mariing itinanggi ng mga ito na may kinalaman sila sa pagpaslang mga tauhan ng SAF at konektado sila sa rebeldeng grupo.
December 17, 2015
Muling nabigo ang karamihan sa mga respondent sa sumipot sa pagdinig ng DOJ noong Disyembre.
Nitong nakaraang January 14, tuluyan nang isinara ng DOJ ang preliminary investigation sa mga reklamo.
Posibleng sa susunod na buwan ay maglabas na ng resolusyon ang DOJ panel dito malalaman kung may sapat nga bang batayan upang kasuhan sa korte ang mga respondent kaugnay ng madugong insidente sa Mamasapano.
(Roderic Mendoza/UNTV News)
Tags: Mamasapano incident
Ipinagpaliban ng Sandiganbayan ang arraignment o pagbasa ng sakdal kay dating Pangulong Benigno Aquino III kaugnay sa Mamasapano incident.
Ito’y matapos maglabas ng temporary restraining order noong February 9 si Chief Justice Maria Lourdes Sereno na chairman ng First Division ng Supreme Court.
Ang inilabas na TRO ay bilang tugon sa apela ng Volunteer’s Against Crime and Corruption sa desisyon ng Ombudsman na kasuhan lamang si Aquino ng graft at usurpation of authority sa halip na reckless imprudence resulting to homicide.
Bukod dito, inatasan din ng SC ang Ombudsman na huwag munang ituloy ang kasong isinampa laban kina Aquino, dating PNP Chief Alan Purisima at dating PNP-SAF Director Getulio Napeñas.
Suportado rin ni Solicitor General Jose Calida ang petisyon ng VACC at sinabing dapat makasuhan ng criminal negligence si Aquino dahil sa pagkamatay ng 44 na tauhan ng PNP-SAF sa Mamasapano incident.
( Rey Pelayo / UNTV Correspondent )
Tags: Aquino, Mamasapano incident, Sandiganbayan
Tatlong taon na ang lumipas, ngunit hanggang ngayon ay hindi pa rin naghihilom ang sugat na iniwan sa mga mahal sa buhay ng apat na pu’t apat na miyembro ng Philippine National Police Special Action Force na nasawi sa malagim na trahedya sa Tukanalipao, Mamasapano, Maguindanao.
Tulad na lamang ni Rohirmina Asjali, ina ni PO3 Jedz-In Asjali, sariwa pa rin umano sa kaniyang ala-ala ang anak noong nabubuhay pa ito.
Si Jedz-In ay miyembro ng 55th SAF na napatay sa bakbakan sa oplan exodus o ang misyon para mahuli ang international terrorist na si Zulkifli Bin Hir o “Marwan” noong January 25, 2015 sa Mamasapano.
Pangalawa ito sa tatlong magkakapatid, binata ngunit siya ang sumusuporta sa dalawang kapatid na kapwa may pamilya na. Makalipas ang tatlong taon, wala pa ring napapanagot sa madugong insidente.
Ngunit hindi umano magsasawang sumisigaw para sa katarungan ang mga katulad ni Rohirmina na hindi nawawalan ng pagasa na mabibigyang hustisya ang pagkamatay ng mahal sa buhay.
( Leslie Longboen / UNTV Correspondent )
Tags: hustisya, Mamasapano incident, SAF 44
Paglabag sa RA 3019 o Anti-Graft and Corrupt Practices ACT at usurpation of official functions ang mga inihaing kaso ng Office of the Ombudsman laban kay dating Pangulong Benigno Aquino III.
Nag-ugat ang kaso sa naging operasyon ng Philippine National Police sa Mamasapano noong 2015 kung saan 44 na miyembro ng PNP Special Action Force ang napatay.
Base sa impormasyon ng kaso, nagpa-impluwensya si Aquino sa noo’y suspendidong PNP Chief Alan Purisima kaugnay sa Oplan Exodus para mahuli si Marwan at Basit Usman.
Nilabag umano ni Aquino ang PNP Chain of Command, ang Suspension Order ng Office of the Ombudsman laban kay Purisima at maging ang kautusan ni noo’y OIC PNP Chief Leonardo Espina na huminto sa pagganap ng tungkulin ang mga sinuspindeng opisyal ng PNP.
May kabuoang P40k lamang ang inerekomendang piyansa ng Office of the Ombudsman sa 2 kaso laban sa dating Pangulo.
Ayon kay Senator Antonio Trillanes IV, ang noo’y direktor ng PNP Special Action Force o SAF na si Getulio Napeñas ang dapat managot at hindi ang dating Presidente.
Ayon naman kay Sen. Bam Aquino, bukas ang dating Pangulo sa naging papel nito sa trahedya sa Mamasapano kaya’t tiwala siyang haharapin nito ang kaso at umaasang lalabas din sa huli ang katotohanan.
Ayon sa VACC, na siyang original complainant sa kaso ng SAF 44, mali at mas mababang kaso ang isinampa ng Ombudsman.
Paniwala nila, inhustisya itong maituturing para sa mga biktima. Duda rin ang grupo sa motibo ng Ombudsman.
Tila inuunahan umano ni Morales ang pag-aksyon ng Korte Suprema sa kanilang apela na repasuhin ng resulta ng imbestigasyon sa kaso.
Ayon sa grupo, pwede pang maglabas ng TRO ang S.C. upang patigilin ang proceedings sa Sandiganbayan.
Sa text message ni Abigail Valte, tagapagsilata ni dating Pangulong Benigno Aquino III, sinabi nito na maglalabas sila ng pahayag hinggil sa inihaing kaso.
( Rey Pelayo / UNTV Correspondent )
Tags: Aquino, Mamasapano incident, Ombudsman
