Itataas na sa full alert status ang buong pwersa ng National Capital Region simula huwebes ng ala-sais ng umaga
Ito’y upang matiyak ang kaligtasan ng publiko na magtutungo sa mga sementeryo ngayong undas.
Kaya naman, sinabi ni NCRPO PIO Chief PCInsp. Kimberly Molitas, bawal ang mag absent at cancel din ang leave ng mga tauhan ng PNP.
Ayon pa kay Molitas, bahagi ng kanilang security measures ang paglalagay ng mga assistance hub sa may 98 na sementeryo, 150 bus terminals, 2 ports at 7 pier sa Metro Manila.
Kabilang sa ipinagbabawal dalhin ay mga matutulis at matatalim na bagay, flammable object, sound system, at alak.
Katulong ng mga pulis ang medical group at force multiplier sa pangangalaga ng kapayapaan at pagbabantay sa mga sementeryo ngayong undas.
Mayroon na rin aniyang police assistance desk ang NCRPO sa lahat ng petron gasoline station para naman sa seguridad ng mga maglalakbay at uuwi sa kani-kanilang mga lalawigan.
Dagdag pa ng tagapagsalita ng NCRPO, wala silang natatanggap na ano mang security threat ngayong undas. ( Lea Ylagan / UNTV News )
