Sumuko sa PNP Counter Intelligence Task Force o CITF ang pitong pulis na sangkot sa kidnapping at extortion sa isang sibilyan. August 11 nang dukutin ng mga pulis ang isang sibiliyan sa Barangay Longos sa Malabon City.
Humingi umano ng isandaang libong piso ang mga suspek sa magulang ng biktima kapalit ang kalayaan nito. Agad namang humingi ng tulong ang mga magulang ng biktima sa CITF.
Isang joint operation ang isinagawa ng NPD at CITF subalit natunugan ito ng mga suspect.
Ngutin kinabukasan ay kusang sumuko ang mga suspek na natukoy na mga kawani ng Navotas PNP. Kabilang dito sina PO1 Emmanuel Benedict Alojacin, PO1 Mark Ryan Mones, PO2 Jonnel Barocaboc, PO3 Kenneth Loria, PO1 Christian Bondoc, PO1 Jack Rennert Etcubañas at PO2 Jessrald Pacinio.
Ayon kay CITF Director PSSUPT Jose Chiquito Malayo, patunay lamang ito na epektibo ang kanilang kampanya laban sa mga tiwaling pulis.
Samantala, sasampahan naman ng kasong kidnapping at physical injury ang pitong pulis.
(Asher Cadapan Jr. / UNTV Correspondent)
