Sampung bansa sa Southeast Asia ang nagpakitang-gilas sa ginanap na Southeast Asia Video Festival for Children. Kabilang dito ang bansang Brunei, Myanmar, Indonesia, Laos, Malaysia, Cambodia, Singapore, Thailand, Vietnam at Pilipinas.
Ang tema ng festival para sa taong ito ay “Everyday Heroes”.
Kailangang maipakita ng mga bata mula sa iba’t-ibang bansa ang naturang tema sa pamamagitan ng isang maikling pelikula o short film.
Kabilang naman ang tatlong estudyante mula sa La Verdad Christian College, Apalit Pampanga na nakapag-uwi ng karangalan sa idinaos na patimpalak.
Ang short film entry ng La Verdad na pinamagatang “Kapteyn” ang itinanghal na best video sa dalawang kategorya, ang Children’s Juror Award Amateur Level at Professional Non-Fiction Category Amateur Level.
Ayon sa mga hurado, angat ang short film na Kapteyn sa ibang mga entry mula sa ibang bansa.
Humanga rin si Ms. Elvira Go na founder ng Video Festival for Children sa mga short film na ginawa ng mga bata kung kaya’t hinihikayat niya ang iba na sumali rin.
Ang susunod na Video Festival for Children ay gagawin naman sa bansang Cambodia na may temang “Diversity in Culture, United in Love”.
( Mon Jocson / UNTV Correspondent )
Tags: Kapteyn, La Verdad, Southeast Asia Video Festival for Children
Mula sa mahigit isang daang entries ng iba’t-ibang TV networks, schools at organizations, siyam na short film ang tinanghal na best video sa katatapos na Sinebata 2018.
Wagi sa amateur category ang entry ng La Verdad Christian College Apalit, Pampanga na pinamagatang “Kapteyn.” Apat na minuto ang haba ng video entry na ginawa sa loob lamang ng isang araw.
Kuwento ito ng isang mahirap na batang nangangarap maging kapitan ng barko, pero walang pantustos sa kanyang pag-aaral na sinabayan pa ng pagkakasakit ng kaniyang nanay.
Pero hindi naging hadlang ang hirap na kalagayan ng bata na nagpursigeng magtrabaho para may pang gastos sa pag-aaral, habang inaalagaan ang inang may sakit.
Ito na ang pangalawang pagkakataon na nagwagi ang La Verdad at nakuha ang best video sa amateur category.
Noong nakaraang taon, wagi rin ang short film ng La Verdad na pinamagatang “Lansangan” sa Sinebata 2017, at nanalo din sa Southeast Asia Video Festival for Children 2017.
May temang Everyday Heroes naman ang ikalawang Southeast Asia Video Festival for Children and the Youth ngayong taon.
Mula sa siyam na napiling short videos ng Sinebata 2018, dalawa dito ang ilalaban naman para sa 2018 2nd Southeast Asia Video Festival for Children sa darating na ika-22 ng Nobyembre at gaganapin sa Manila Peninsula sa Makati.
Naging emosyonal naman ang presidente ng Anak TV dahil sa tagumpay ng organisasyon at makabuluhang adbokasiyang nais ihayag.
Unity and diversity ang ilan sa mga layunin ng organisasyon ng Anak TV na kinikilala at pinaparangalan ang malikhaing kaisipan at gawa ng mga kabataan sa pamamagitan ng maikling video na nagpapakita ng magandang inspirasyon at aral sa buhay.
( JL Asayo / UNTV Correspondent )
