METRO MANILA, Philippines – Suportado ng Philippine National Police ang pagpapatupad ng mandatory ROTC sa Senior High School.

Ayon kay PNP spokesperson Police Colonel Bernard Banac, makatutulong ito sa mga kabataan para maging handa sakaling nais ng mga ito na pumasok sa PNP o sa Armed Forces of the Philippines (AFP).

Malaki din aniya ang maitutulong ng ROTC para maging handa ang mga kabataan sakaling kailanganin ng pamahalaan ang dagdag pwersa sa panahon ng kalamidad.

 “Kung saka sakaling may pangangailangan na magpatawag tayo ng reserba, hindi lamang sa segurdidad kundi pati sa pag responde sa mga disaster, calamities and emergencies.” Ayon kay Police Col. Bernard Banac, Spokesperson ng PNP.

Sa isang pahayag, sinabi naman ng Department of National Defense na makatutulong ang mandatory ROTC upang mahubog ang mga kabataan sa pagmamahal sa bansa, pagrespeto sa karapatang pantao at pagiging mabuting mamamayan.

Naniniwala din ang kagawaran na kailangan ng bansa ang pagkakaroon ng mga kabataang responsable, disiplinado at handang maglingkod sa bansa.

Pasado na sa mababang kapulungan ng Kongreso ang House Bill number 8961 na layong buhayin ang mandatory ROTC sa Senior High School.

(Lea Ylagan | UNTV News)

Tags: AFP, Mandatory ROTC, PNP