Tiniyak ng Liberal Party na matatag ang kanilang partido sa kabila ng mga batikos at balitang pag-alis ng ilang miyembro nito.
Ayon kay LP Spokesperson Congressman Miro Quimbo, hindi pa nila nakukumpirma ang balitang lumipat na kay PDP Laban Presidential candidate Rodrigo Duterte si Davao Rep. Isidro Ungab, isa sa mga stalwart ng LP.
Ito ay bagamat sa facebook account ni Ungab, ipinagtatanggol nito si Davao City Mayor Rodrigo Duterte sa kaliwa’t kanang batikos.
May shares post din ito sa pangunguna ni Duterte sa isang survey bilang kumakandidatong presidente.
Ayon kay Quimbo una nang itinanggi ni Congressman Ungab ang balita.
Maging ang tagapagsalita ng pangulo ay hindi na rin nagbigay ng kumento sa bagay na ito.
Sinubukan naman ng UNTV News na kunan ng pahayag ni Congressman Ungab subalit hindi nito sinasagot ang anumang tawag at text messages.
Maliban kay Ungab una nang umalis sa Liberal Party si Davao 1st District Rep. Karlo Nograles at LP Provincial Chairman Davao del Norte Governor Rodolfo del Rosario. (Grace Casin/UNTV News)
Tags: LP Spokesperson Congressman Miro Quimbo, PDP Laban Presidential candidate Rodrigo Duterte
