Nanlilisik ang mata ng lalaking ito habang nakatutok ang kutsilyo sa kanyang hostage. Kapansin-pansin din ang mga dugo sa kamay at damit ng biktima dahil bumabaon na ang kutsilyo sa kanyang balikat. Tumagal ng tatlong oras ang hostage drama.

Kinilala naman ang suspek na si Jirrem Amigo, 27 anyos at ang biktima na tiyuhin pala niyang si Jerry Pisngot, 55 anyos. Agad na isinugod ang biktima sa Quezon City General Hospital dahil sa tinamo nitong mga sugat sa balikat.

Ayon kay Quezon City Police Chief Guillermo Eleazar, nasa impluwensya ng ipinagbabawal na gamot ang suspek. Paliwanag naman ng suspek, ginamit niya lang pananggalang ang kaniyang tiyuhin laban sa mga lalaking sumusunod sa kanya kaya nya nagawa ang panghohostage.

Nasa kustodiya na ng Quezon City Police Station 2 ang suspek na nahaharap sa mga kasong alarm and scandal at frustrated murder.

(Macky Libradilla / UNTV Correspondent)

Tags: droga, nang-hostage, Quezon City