Tinulungan ng UNTV News and Rescue Team ang lalaking biktima ng hit and run sa Taft Avenue Corner Ayala Boulevard sa Ermita Maynila pasado alas dos kaninang madaling araw.
Isang lalaki na kinilalang si Paul Jerome Bautista ay nagtamo ng posibleng bali sa kaliwang hita at gasgas sa ibat ibang bahagi ng katawan.
Nilapatan ng pang-unang lunas ang biktima at dinala sa Manila Doctors Hospital.
Ayon kay Bautista, kasalukluyang nyang binabagtas ang kahabaan ng Taft Avenue nang biglang banggain ng truck sa intersection lane ang unahang bahagi ng kaniyang motor.
Hindi naman niya nakuha ang plaka ng truck.
Samantala, nirespondehan ng UNTV News and Rescue Team ang isang aksidente sa bahagi ng Barangay Colo sa Dinalupihan, Bataan bandang alas-otso y media ng gabi noong biyernes.
Nadatnan ng grupo ang biktimang si Ralph Due, 22-anyos habang iniinda ang mga tinamo niyang sugat sa paa, hita at siko sanhi ng malakas na pagkakabagsak mula sa minamanehong motorsiklo.
Sa salaysay ng biktima, binabagtas niya ang madilim na kalsada pauwi sa kanilang bahay nang may bigla tumawid na aso.
Nawalan umano siya ng kontrol sa manibela dahilan upang matumba ang motorsiklo at sumadsad siya sa kalsada.
Matapos lapatan ng paunang lunas ang kanyang mga sugat ay tumanggi na siyang magpahatid sa ospital.
