Pormal na nanumpa si Kuya Daniel Razon kagabi bilang honorary member ng Philippine Military Academy Maringal Class of 1988. Ibig sabihin, kinikilala bilang “fraternal member” ng premyadong institusyon ng militar si Mr. Public Service Kuya Daniel Razon.
Ayon kay Police Director Leo Angelo Leuterio, pumasa si Kuya Daniel sa kanilang kwalipikasyon upang maging bagong miyembro ng PMA Maringal Class of 1988, PNP chapter.
Ayon kay Kuya Daniel, pangarap niya noon na maging isang military personnel kung hindi siya natuloy sa pagiging isang brodkaster. At dahil nasa dugo na ni Kuya Daniel ang public service, sa halip na pakinabang ay inialok nito sa kanyang mga ka-brad ang pwede niyang maitulong sa mga miyembro at nasasakop ng Maringal Class of 1988.
Kabilang dito ang araw-araw na medical mission ng UNTV, free scholarship program para sa mga kabataan at serbisyo ng News and Rescue.
Naniniwala ang Maringal class of 1988 na lalo pang mapapaigting ang kanilang layunin na makatulong sa kapwa sa pagsanib ni Kuya Daniel Razon sa kanilang grupo.
Nakahanda naman ang mga miyembro ng asosasyon na sumailalim sa rescue training ng UNTV.
Bukod kay Kuya Daniel, itinuturing ding Mistah ng PMA Class of 1988 si dating DOTC Secretary Emilio Abaya, dating Vice President Jejomar Binay at Senador Jv Ejercito.
(Mon Jocson / UNTV Correspondent)
Tags: Kuya Daniel Razon, PMA Class of 1988, UNTV
