Bubuo ng bagong panel ng prosecutors ang Department of Justice para sa muling pagbubukas ng kaso noong 2013 ng labing tatlong pulis na umano’y ninja cops na pinangungunahan ni Police Major Rodney Baloyo.
Ang naturang Ninja Cops ay nagtago umano ng 160 kilograms ng shabu.
Nakakuha rin umano ang mga ito ng 50 million pesos at mga bagong Sport Utility Vehicle (SUV) kapalit ng kalayaan ng umano’y Chinese drug trafficker na si Johnson Lee.
Ayon kay Justice Secretary Menardo Guevarra dahil sa mga bagong ebidensya na lumutang ay muli itong bubuksan ng DOJ.
Bibigyan rin ng pagkakataon ang magkabilang panig na maghain ng mga dagdag ebidensya, susubukan nilang resolbahin ito sa loob ng isang buwan.
Muling sisilipin ng DOJ ang dinismiss na kaso ng mga pulis partikular na dito ang ilang probisyon sa ilalim ng Comprehensive Dangerous Drugs Act of 2002. Kabilang na ang misappropriation o maling pagdedeklara sa nakuhang droga at pagtatanim ng ebidensya.
Ang labing tatlong pulis ay tinanggal na sana sa pwesto kasunod ng nangyaring iregularidad sa drug raid, pero sa halip ay napatawan lamang sila ng one-rank demotion.
Nabulgar sa pagdinig sa Senado ang hindi magkatugmang pahayag ni Baloyo ukol sa nangyaring drug raid. 4:30 ng hapon umano nangyari ang raid sa bahay ni Lee samantalang base sa records ay sa umaga nila ito ginawa.
Naniniwala ang mga Senador na posibleng ginamit nila ang mga oras sa pagitan ng umaga at 4:30 pm upang maitago ang shabu at pera at umaresto ng ibang Chinese national bilang kapalit ni Lee na kanilang pinatakas kapalit ng suhol.
(Nel Maribojoc | UNTV News)
Tags: Department of Justice, Police Major Rodney Baloyo, “ninja” cops
METRO MANILA, Philippines – Tinanggal na sa serbisyo ang 3 sa 13 tinaguriang ninja cops. Ang pagkaka dismiss ng mga ito ay may kaugnayan sa pagkakasangkot din nila sa kontrobersyal na drug raid sa Antipolo, Rizal noong Mayo.
Kinilala ang mga ito na sina Police Master Sergeant Donald Roque, Police Master Sergeant Rommel Vital at Police Corporal Romeo Encarnacion Guerrero Jr.
Samantala muling pina-iimbestigahan ni PNP Officer in charge Police Lieutenant General Archie Gamboa sa Internal Affairs Service ang kaso ni Police Lieutenant Joven De Guzman na dawit din sa Antipolo drug raid at kasama sa mga tinaguriang ninja cops.
Una ng pinatawan ng 59 day suspension si De Guzman dahil sa kontrobersyal na raid noong Mayo pero nais ni gamboa na matanggal din ito sa serbisyo.
“We cannot close our eyes. Kasi nandun mismo sa ebidensya eh. Sa course ng investigation, lumalabas, hindi, mas may malaki kang kasalanan. That is why it is remanded back to IAS.” ani PNP OIC Police Lieutenant General Archie Gamboa.
Ayon naman kay Gamboa, ma-aari pa ring maghain ng motion for reconsideration ang mga na-dismiss na pulis. Samantala ipina-uubaya naman ng PNP sa Department Of Justice ang paghahain ng kasong kriminal laban sa mga tinaguriang ninja cops habang sa National Police Commission (NAPOLCOM) naman ang magsasampa ng kasong administratibo.
Tiniyak naman ni Gamboa na tatalima sila sa kalalabasan ng imbestigasyon ng DOJ kaugnay sa maanomalyang 2013 Pampanga drug raid.
(Harlene Delgado | UNTV News)
Tags: DOJ, PNP, “ninja” cops
METRO MANILA, Philippines – Tuluyan nang isinama ng Philippine National Police Criminal Investigation and Detection Group (PNP-CIDG) si resigned PNP Chief Police General Oscar Albayalde bilang isa sa mga respondent sa reklamong kriminal na inihain sa Department Of Justice (DOJ) laban sa mga tinaguriang ninja cops.
Para ito sa mga kasong paglabag sa Republic Act 9165 o Comprehensive Act of 2002, anti-graft and corrupt practices act, qualified bribery at perjury. Binago ng PNP-CIDG ang orihinal na reklamo at idinagdag si Albayalde bilang respondent kasama ng 13 ninja cops.
Sa isang text message, naging maikli lang ang tugon ni Albayalde at sinabing mabibigyan siya due process sa hakbang na ginawa ng CIDG. Ayon sa PNP-CIDG, may pananagutan si Albayalde matapos mangialam umano sa naantalang dismissal order ng ninja cops.
“There is no strong single evidence no. ‘yung circumstances lang naman that will show that he is probably liable. Kasama rin doon of course ‘yong mga admission sa senate investigation.” ani CIDG Chief of legal division, PLtCol. Joseph Orsos .
Si Albayalde ang police provincial director nang mangyari ang drug raid sa Pampanga noong 2013. Dumistansya naman ang Malacañang sa pagkakasama kay Albayalde sa mga sinampahan ng reklamo ng CIDG.
“From the very start, we said if they feel that they have the case against anyone, then they can file it and let the law takes its course.” ani Presidential Spokesperson & Chief Presidential Legal Counsel Sec. Salvador Panelo.
Inakusahan ang grupo ng mga pulis na pinamumunuan ni police Major Rodney Baloyo ng pagtatanim ng ebidensya at pag-recycle ng mga nakukumpiskang iligal na droga mula sa isang suspected drug lord na si Johnson Lee. Sa ikalawang araw ng preliminary investigation ng DOJ, hindi ulit nakadalo si Baloyo na kasalukuyang nakakulong sa new bilibid prison sa Muntinlupa.
(April Cenedoza | UNTV News)
Tags: DOJ, PNP-CIDG, “ninja” cops
METRO MANILA, Philippines – Maituturing na national disappointment para sa administrasyong Duterte kung ‘di masasampahan ng kaukulang kaso ang mga tinatawag na ninja cops o mga pulis na sangkot umano sa agaw-bato incident o pagre-recylce ng nakumpiskang iligal na droga sa Pampanga anti-illegal drug operation noong 2013. Ito ay ayon kay Senator Richard Gordon, ang tagapanguna sa Senate Blue Ribbon and Justice and Human Rights Committee na nag-iimbestiga sa naturang kontrobersya.
Una nang isinasangkot ng mga accuser na protektor umano at may kinalaman sa naturang operasyon ang bumaba sa pwestong Philippine National Police Chief Police General Oscar Albayalde.
Ayon din sa mambabatas, pagkakataon na ito para ipakita ni Pangulong Rodrigo Duterte na wala siyang kinikilingan kahit pa sa mga una niyang pinagkatiwalaan kung nasasangkot sa katiwalian at iregularidad.
Subalit ayon sa Palasyo, nakahanda namang suportahan ang pagsasampa ng kaso laban sa dating hepe ng PNP at iba pa kung may matibay na ebidensyang maihahain laban sa kanila.
“The President is the number 1 enforcer of the law, so if there is evidence against any wrong doing, then it behooves the government to file and prosecute,” ani Sec. Salvador Panelo, Presidential Spokesperson and Chief Presidential Legal Counsel.
Tuloy naman ang imbestigasyon ng Department of the Interior and Local Government kung may administrative liability si Albayalde.
Si Pangulong Duterte mismo ang nagsabing hihintayin niya ang resulta at rekomendasyon ng DILG hinggil sa isyu.
Sakaling may matibay ding ebidensya, posibleng masampahan din ng criminal case si Albayalde.
“It’s the prosecutor who will determine the existence of the probable cause,” dagdag ni Sec. Salvador Panelo.
Samantala, wala pang inilalabas na desisyon ang Pangulo hinggil sa nais niyang humalili sa naiwang pwesto ni Albayalde.
(Rosalie Coz | UNTV News)
Tags: albayalde, duterte, Malacañang, PNP, “ninja” cops
