Sa gitna ng maraming hamon sa Pilipinas sanhi ng pulitika o hagupit ng kalikasan, hindi maikakailang nananalaytay pa rin sa dugo ng maraming mga Pilipino ang patriotismo o pagiging makabayan.
Para sa National Historical Commission of the Philippines (NHCP), ito ang isa sa mga katangian ng mga Pilipino na dapat mapanatili lalo na ng kasalukuyang henerasyon.
Ito ay sa pamamagitan na rin ng pagbabalik-tanaw sa mga ipinaglaban ng mga Pilipinong bayani upang makamtan lamang ang kalayaan ng bansa. Ito rin ang pinakatema ngayon ng paggunita sa Araw ng Kasarinlan.
Pagdating sa inspirasyon ng pakikipaglaban, hindi rin naman pahuhuli ang mga Pilipino tulad na lamang ng mga itinuturing na mga bagong bayani na patuloy na nakikipagsapalaran at nagsasakripisyo sa ibang bansa para sa pamilya at maging sa bayan.
Ang isang ina o ama na itinatawid sa araw-araw sa gutom ang pamilya sa gitna ng kahirapan sa buhay at mga pulis at sundalo na laging nakaamba sa panganib mapanatili lamang ang kapayapaan.
Ayon sa Armed Forces of the Philippines (AFP), hindi man naka-uniporme ay napatunayan na rin nila ang pagmamalasakit sa bayan ng mga Pilipino nang ilagay ang watawat ng bansa sa ilalim ng dagat sa Philippine Rise noong nakaraang buwan.
Kasama ang mga nasa pribadong sektor tulad ng UNTV Dive Team na sumisid sa kalaliman ng dagat.
Sang-ayon naman dito ang NHCP.
( Nel Maribojoc / UNTV Correspondent )
Tags: Araw ng Kasarinlan, kalayaan, NHCP
Hindi napigilan ng walang tigil na pagbuhos ng ulan sa Maynila ang paggunita sa ika-120 taon ng Araw ng Kasarinlan ng Pilipinas.
Pinangunahan ni Vice President Leni Robredo ang wreath laying ceremony sa monumento ni Jose Rizal kasama ang ilang opisyal ng National Historical Commission of the Philippines.
Sa mensahe ng pangalawang pangulo, dapat aniya ay lalong manindigan sa karapatan ang mga Pilipino sa gitna ng mga panganib na kinahaharap ng bansa gaya ng paglaganap ng kahirapan, pagtaas ng presyo ng mga bilihin, kawalan ng hustisya at problema sa pinag-aagawang teritoryo.
Sa Bulacan, pinangunahan naman ni Senator Richard Gordon ang Independence Day celebration sa Malolos.
Pagkatapos ng flag raising ceremony kasama ang mga opisyal ng lalawigan, nagkaroon din ng oath to the national flag at wreath laying ceremony sa bantayog ni Gen. Emilio Aguinaldo.
Sa Olangapo, hindi naman natinag ang mga taga-Olongapo City upang ipagbunyi ang nakamit na kalayaan mula sa pananakop ng mga banyaga.
Kaalinsabay nito ang pagbibigay ng pagkilala sa centenarian na si Lola Elisia Gatmin bilang pinakamatandang nabubuhay sa Olongapo City. Pinagkalooban din siya ng isang daan libong piso
Sa Tacloban, isang simpleng selebrasyon naman ang isinagawa sa Leyte sa pangunguna ni Gov. Leopoldo Petilla.
Pinaalalahanan ni Gov. Petilla ang mga Leyteño na magtulung-tulong upang mapanatili ang kasarinlan at malabanan ang kahirapan.
At sa Ilo-ilo, itinaas naman ang isang giant flag sa bayan ng Sta. Barbara. May sukat ito na 30 ft by 60 feet.
Ayon sa National Commission for Culture and the Arts, dito sa Sta. Barbara isinagawa ang kauna-unahang pagtataas ng bandera ng Pilipinas sa labas ng Luzon noong 1898 matapos matalo ng Pilipinas ang Espanya.
( Grace Casin / UNTV Correspondent )
Tags: Araw ng Kasarinlan, NHCP, Pilipinas
Ngayong pinagdiriwang ng Pilipinas ang ika-isandaan at dalawampung taon ng Araw ng Kasarinlan.
Binigyang-diin ni Vice President Leni Robredo na hindi dapat balewalain ng pamahalaan ang naging desisyon ng Permanent Court of Arbitration sa The Hague na ang Pilipinas ang may exclusive economic zone sa South China Sea base sa United Nations Convention on the Law of the Sea.
Ito ay kasunod na rin ng mga ulat na mismong mga Pilipinong mangingisda ay pinagtatabuyan ng mga Tsino sa sarili nating teritoryo.
Ayon sa pangalawang pangulo, nanalo na ang Pilipinas sa pinag-aagawang terirtoyo kaya hindi na dapat pang payagan ang bansang Tsina na angkinin ito.
Ikinatatakot naman ni dating Solicitor General Florin Hilbay na baka mabaon nalang sa limot ang karapatang ng Pilipinas sa West Philippine Sea dahil sa tila pakikipagkaibigan pa ng kasalukuyang administrasyon sa bansang Tsina.
( Grace Casin / UNTV Correspondent )
