Isinalaysay ni Jaybee Sebastian na ilang araw matapos ang raid sa Bilibid noong December 2014, nagbigay umano siya ng dalawang milyong piso sa noo’y aide ni Sec. Leila de Lima na si Joenel Sanchez.

Kinabukasan, tinawagan umano siya ni Sanchez at nakausap niya mismo sa telepono si De Lima.

Enero nang nakaraang taon naman nang mangyari ang pagpapasabog ng granada sa Bilibid, nag text aniya sa kanya si Sanchez at nagpahanda ng dalawang milyong piso para kay De Lima.

Ipinatawag din daw siya sa opisina ni dating BuCor Director Franklin Bucayu at kinausap siya ni De Lima tungkol sa insidente.

Napakiusapan pa umano niya ang dating kalihim na huwag i-bartolina ang mga gang leader dahil sa pagpapasabog.

Dito rin umano niya personal na ibinigay kay De Lima ang 2 million pesos na nakalagay sa isang paper bag.

Sa kabuuan, hanggang Mayo nang nakaraang taon, umaabot umano ng sampung milyong pisong drug money ang naibigay niya kay De Lima.

Taliwas umano sa paniwalang pinapaboran siya ni De Lima at ibang opisyal ng Bilibid, sinabi ni Sebastian na may ibang motibo kaya hindi siya isinama nang ilipat ang bilibid 19 sa NBI detention cell.

Sa kabila nito, itinanggi ni Sebastian na inutusan niya ang ibang gang leader na magbenta ng droga para sa kampanya ni De Lima.

Pito o walong beses umano niyang nakausap ang dating kalihim ngunit ito ay dahil naitalaga siyang tagapagsalita ng mga gang sa Bilibid.

(Roderic Mendoza / UNTV Correspondent)

Tags: dating Sec. Leila de Lima, Jaybee Sebastian, P10M drug money