Nabulabog ang mga taga-Barangay 338 sa Santa Cruz, Maynila nang makita ang nakahandusay na bangkay ng isang lalaki bandang alas tres ng madaling araw kanina.

Hindi kilala ng mga residente ang biktima ngunit isang ID ang bulsa nito na may pangalang Rommel San Gabriel ngunit walang larawan.

Batay sa kuha ng closed-circuit television camera sa lugar, nakita ang dalawang suspek kasama ang biktima sakay ng isang motorsiklo.

Bumaba ang mga ito sa madilim na bahagi ng kalsada habang tumitingin-tingin sa paligid. Nang matyempuhan ng mga ito na wala nang tao sa lugar ay ibinaba ang biktima sa bangketa at saka ito pinagbabaril.

Ayon sa ilang mga residente, tinatayang limang putok ng baril ang narinig nila. Nagkalat ang mga basyo ng baril sa lugar ng pinangyarihan ng pamamaril.

Sa pagsisiyasat ng mga tauhan ng Manila Police District (MPD), nakaposas pa ang biktima na nagtamo ng tama ng bala ng baril sa iba’t-ibang bahagi ng katawan.

Patuloy pang iniimbestigahan ng mga otoridad ang insidente at kinukumpirma ang tunay na pagkakakilanlan ng biktima.

( Asher Cadapan Jr. / UNTV Correspondent )

Tags: Maynila, MPD, summary execution