Balik Pilipinas na ang Aegis Juris Fraternity member na itinuturing na isa sa mga suspek sa pagkamatay ng UST law student na si Horacio Castillo III dahil sa hazing.
Alas onse quarenta ng umaga kahapon nang dumating sa NAIA Terminal 1 si Ralph Trangia kasama ang kaniyang inang si Rosemarie.
Tikom ang bibig ng binata paglabas ng paliparan at dumiretso na ito sa kanilang tahanan sa Quezon City.
Hindi ito sumama o nagbigay ng pahayag sa Manila Police District na sumalubong din dito upang hikayatin ito na makipagtulungan sa imbestigasyon sa kaso ni Atio.
Isa si Trangia sa mga sinampahan ng reklamong murder at paglabag sa anti-hazing law kaugnay sa pagkamatay ni Castillo.
Pero bago makapaglabas ng look out bulletin ang Bureau of Immigration noong September 20, nakaalis na ng Pilipinas si Trangia kasama ang kaniyang ina na nahaharap rin sa kasong obstruction of justice.
Sa ngayon, kailangan munang sagutin ni Trangia ang nakahaing reklamo laban sa kaniya sa DOJ.
Umaasa naman ang pamilya Castillo, na magsasabi ng totoo si Trangia at bibigyang-linaw ang mga sirkumstansya sa pagkamatay ni Atio.
Welcome development naman para kay Justice Secretary Vitaliano aguirre ang pagbalik bansa ng suspek.
Bukas ang Justice Department na gawin itong testigo sa krimen at magbigay ng seguridad kung hihilingin nito.
( Reynante Ponte / UNTV Correspondent )
Tags: Horacio Castillo III, Ralph Trangia, Suspek
Nabulabog ang mga residente ng Sitio San Roque sa Barangay Bagong Pag-asa, Quezon City nang makarinig ng sunod-sunod na putok ng baril pasado alas onse kagabi.
Pinagbabaril ng hindi pa nakikilalang suspek ang tatlong magkakaanak habang magkakatabing natutulog ang mga ito sa loob ng kanilang bahay.
Kinilala ang mga ito na sina Romeo Ado Sr., ang asawa nitong si Christine Ado, at ang labing-isang taong gulang na anak na si Romeo Ado Jr.
Ayon sa mga otoridad, isang witness ang nakakita sa suspek na mag-isang naglakad papunta at paalis sa bahay ng mga biktima. Nagtanong pa umano ang suspek sa saksi bago mangyari ang krimen.
Ilang saglit pa ay hindi bababa sa walong putok ng baril ang narinig mula sa loob ng bahay pamilya Ado.
Nagtamo ang mga biktima ng mga tama ng baril sa ulo at iba pang bahagi ng katawan. Na-recover sa lugar ang mga basyo ng bala ng 9 mm pistol.
Suspetsa ng kaanak ng mga biktima, maaaring may kinalaman ang insidente sa iligal na droga. Bumuo na ng tracker team ang Quezon City Police District na tutugis sa suspek.
( Asher Cadapan Jr. / UNTV Correspondent )
Tags: patay, Quezon City, Suspek
Bawal nang iparada o i-hilera ng mga pulis sa media ang mga naarestong suspek.
Ginawa ni PNP Chief Police Dir. Gen Oscar Albayalde ang direktiba alinsunod sa nauna nang kautusan ng National Police Commission noong 2008 na sumisentro sa karapatang pantao ng mga nahuhuling suspek.
Ayon kay PNP Spokesperson PSSupt. Benigno Durana, sakop ng direktiba ang lahat ng mga police station, provincial at regional offices ng PNP.
Sinabi pa ni Durana na sinomang lalabag sa kautusan ito ay mahaharap sa kasong administratibo.
Iginiit pa ni Durana na walang nag-udyok kay Albayalde na muling ipatupad ang pagbabawal sa paghilera ng mga suspek sa media.
Wala pang pahayag tungkol dito ang Commission on Human Rights (CHR).
( Lea Ylagan / UNTV Correspondent )
Tags: media, PNP Chief Albayalde, Suspek
Pinangalanan na ng Pasay police ang suspek sa pagpatay sa GRAB driver na si Gerardo “Junjie” Maquidato Jr., ito ay si Narc Tulod Delemios na mayroon na ring pending warrant of arrest sa Parañaque City dahil sa kasong murder noon pang 2014.
Nakuha ng PNP ang impormasyon mula sa live-in partner nito na si Giselle Capati na kasama sa listahan ng mga huling naging pasahero ni Maquidato.
Ayon kay Capati, hiniram ng suspek ang kanyang cellphone alas sais ng gabi noong araw na napatay si Gerardo.
Ibinalik umano ito sa kaniya pasado alas siete ng gabi at nalaman lamang niya na ginamit pang-book ng GRAB nang isauli na sa kaniya.
Sa ngayon ay patuloy ang paghahanap ng mga pulis sa suspek.
Tags: Gerardo Maquidato Jr, GRAB driver, Suspek
