Bukas na ang nakatakdang panunumpa sa tungkulin nina Incoming President Rodrigo Duterte at Vice President Leni Robredo
Kaya naman puspusan na rin ang paghahanda ng magkabilang kampo sa nalalapit na inagurasyon.
Tulad ng gagawin ng susunod na pangulo ng bansa, simple lamang din ang magiging inagurasyon ng pangalawang pangulo.
Sa Quezon City Executive House gaganapin ang inagurasyon ni Vice President Elect Robredo.
Kaya lamang nitong mag-accommodate ng nasa tatlong daang bisita.
Bagamat hindi lahat ay maaaring makapunta, tiniyak naman ni Robredo na bukas araw-araw ang kaniyang tanggapan para sa mga taong may nais idulog.
Una na ring inispeksyon na rin ng Presidential Security Group ang lugar para sa seguridad ng bise presidente.
Samantala, tiniyak naman ni Robredo na makakaasa ang bagong administrasyon sa kaniyang suporta upang maabot at maisagawa ang mga mithiin para sa bansa.
Kahapon ay nagtungo sa Cebu si Robredo upang dumalo sa oath taking ceremony ni Cebu City Mayor Elect Tomas Osmena at ng mga nanalong konsehal sa syudad.
(Gladys Toabi/UNTV Radio)
