Nitong Miyerkules ay may nadadaanan pang sidewalk ang mga residente ng Santa Barbara Villas Subdivision sa San Mateo Rizal kahit na gumuho na ang isang bahagi ng kalsada dahil sa ilang araw na pag-ulan.
Pero kahapon ay tuluyan na itong gumuho, maging ang isang bahagi na kinatatayuan ng ilang mga bahay. Kaya naman napilitan na ang mga residente na maki-silong muna sa ilang kapitbahay.
Ayon sa Home Owners Association, nakahanda na ang pansamantalang lilipatan ng mg residenteng apektado ng naturang landslide. Nangangamba naman ang mga residente sa iba pang bahagi ng subdivison at mga kalapit na lugar na mangyari din sa kanilang area ang katulad na pagguho ng lupa.
Ayon sa mga ito nararamdaman nila ang bahagyang paggalaw ng lupa sa tuwing malakas ang buhos ng ulan.
(Jennica Cruz / UNTV Correspondent)
Tags: lumikas, pagguho ng lupa, San Mateo Rizal
Lubhang madami ang ibinuhos na ulan ng habagat dahilan upang bumaha sa mga bayan ng Marikina at San Mateo Rizal noong Agosto base sa isinagawang geohazard mapping ng Mines and Geosciences Bureau (MGB) Region 4A.
Ngunit hindi rin anila maiaalis ang posibilidad na may kinalaman din ang quarry operations sa pagbaha kaya patuloy ang kanilang imbestigasyon sa insidente.
Nangangamba naman si Barangay Chairman Edgar Sison na bagaman sarado ang Montalban Millex ay samantalahin naman ito ng mga illegal quarry operators.
Ngayong madalas ang mga pag-ulan lalo na sa hapon sa San Mateo Rizal, tigib ng pangamba ang mga residente kaya doble ang kanilang ginagawang pag-iingat at pagmomonitor sa kanilang lugar sa maaring pagbaha.
Samantala, may mga proactive action na umanong ginagawa ang Rizal Provincial Enviromental and Natural Resources Office sa mga landslide prone area sa Rizal upang mabigyan ng tamang aksyon at impormasyon ang mga taong malapit sa mga lugar na ito.
Nangangamba rin ang mga residente na baka sapitin din nila ang magkasunod na landslide sa Itogon, Benguet at City of Naga, Cebu.
( Jennica Cruz / UNTV Correspondent )
Tags: habagat, MGB, San Mateo Rizal
SAN MATEO, RIZAL – Humupa na ang tubig baha sa San Mateo Rizal dahil sa bahagyang paghina ng ulan simula pa kahapon. Ngunit pagkatapos nito ay perwisyo naman ng makapal na putik ang iniwan ng tubig baha sa kanilang lugar.
Mula sa kalsada maging sa loob ng kanilang mga bahay ay makikita ang makapal na putik.
Sa Barangay Banaba ay umaabot ng hanggang tuhod ang putik kaya naman pahirapan kahit sa paglalakad ang mga residente doon.
Ayon sa ilang residente, kadalasang inaabot sila ng tatlong araw bago tuluyang malinis ang mga iniwang putik at kalat ng baha.
Sa ulat ng Municipal Disaster Risk Reduction and Management Office (MDRRMO), hindi pa rin maaaring makauwi ang nasa mahigit apat na libong pamilya o mahigit dalawampu’t isang libong indibidwal na nananatili pa rin sa mga evacuation center.
Tags: makapal na putik, MDRRMO, San Mateo Rizal
