Walong sachet ng marijuana, hinihinalang cocaine at shabu na nagkakahalaga ng P 100,000 ang nakuha sa 31-anyos na yoga instructor sa high-end condo sa BGC, Taguig.
Ayon sa Philippine National Police-Drug Enforcement Group (PNP-DEG), matagal na nilang isinasailalim sa surveillance ang suspek dahil sa pagbebenta ng iligal na droga sa mga events at concert.
Kaibigan din aniya nito ang drug queen na si Karen Bordador na nahuli din sa Taguig noong isang taon dahil sa pagbebenta naman ng ecstacy.
Ayon kay Atty. Rigor, mayroong sindikatong nagpapadala ng droga sa suspek sa pamamagitan ng transport network vehicle services (TNVS) na ibinibenta nito.
Nahaharap sa kasong paglabag sa Republic Act 9165 o Comprehensive Dangerous Drugs Act of 2002 ang yoga instructor.
Nasa pangangalaga naman ng Department of Social Welfare and Development (DSWD) ang tatlong taong gulang na anak ng suspek.
( Lea Ylagan / UNTV Correspondent )
Agad na inaresto ng Quezon City Police District (QCPD) Station 7 ang mag-live in partner na sina Melchor Guadiz at Olga Macabangon nang makabili ng limang daang pisong halaga ng shabu sa kanila ang pulis na nagpanggap ng buyer sa Barangay Soccoro, Quezon City alas otso kagabi.
Ayon sa QCPD, matagal na nilang minamanman ang dalawa na umanoy supplier ng droga sa ilang lugar sa Cubao.
Nang kapkapan ang suspek, nakuha sa mga bulsa nito ang dalawang cellphone, dalawang coin purse na naglalaman ng labing pitong sachet ng hinihinalang shabu at limang daang pisong marked money. Sa kabila nito, todo tanggi pa rin ang mga suspek.
Ayon sa PNP, nakulong na si Melchor Guadiz sa kasong robbery-hold up at nakalaya noong taong 2016.
Sa ngayon, patuloy pa ang ginagawang pagtugis ng PNP sa supplier ng mga suspek na taga-Cavite.
( Gerry Galicia / UNTV Correspondent )
Tags: buy bust operation, droga, QCPD
Isang dating konsehal sa Naga City ang nagpapatunay ngayon na talamak nga ang droga sa lungsod.
Sa isang press conference sa Quezon City, isinalaysay ni Luis Ortega na mahigit sampung taon na ang kalakalan ng iligal na droga sa lungsod.
Labintatlong barangay aniya sa Naga City ang napasok na ng droga at hanggang ngayon ay hindi pa ito nababago. Kulang din aniya ang ginagawang aksyon ng alkalde ng NAGA upang mahuli ang mga drug lord at mga adik.
Ayon pa kay Ortega, natural lang na itanggi ng mga taga Naga ang akusasyong ito kaya sila nagagalit.
Nitong nakaraang Martes, mismong si Pangulong Rodrigo Duterte ang nagsabing shabu hotbed ang Naga City.
Ayon pa kay Ortega, sangkot mismo sa iligal na droga ang kapatid ni dating Naga City mayor at dating DILG Secretary Jesse Robredo na si Butch Robredo.
Pero nilinaw ni Ortega na hindi ito personal at nananawagan lang siya kay vice president leni robredo na tumulong upang sugpuin ang problema sa iligal na droga.
( Charlie Barredo / UNTV Correspondent )
Tags: droga, Luis Ortega, Naga city
QUEZON CITY, METRO MANILA – Aabot sa P7.7 milyong halaga ng mga ipinagbabawal na gamot ang nasabat ng pinagsanib na pwersa ng PDEA, QCPD at NPD Drug Enforcement Unit sa buy-bust operation kagabi laban sa mga nagtutulak ng party drugs sa Quezon City.
Natimbog ang maglive-in partner na sina Hazel Grace Lanugan at Rafael Tadoran, parehong 21-anyos, at Warren Calicdan, 34-anyos, pawang mga target ng operasyon
Nagpanggap na buyer ng ecstasy ang isa sa mga operatiba at nang magkaroon ng pagkakataon ay agad na pinasok ang tahanan ng mga suspek sa #85 Tomas Morato, Brgy. Obrero sa Quezon City.
Nakumpiska ang mahigit 2,000 tableta ng ecstasy, mahigit 200 piraso ng ecstasy capsule, walong bote at isang malaking container ng rape drug o liquid ecstasy, dagdag pa ang 100 gramo ng hinihinalang shabu.
Kakasuhan ang mga suspek ng paglabag sa Republic Act 9165 o ang Comprehensive Dangerous Drugs Act of 2002.
Ulat ni Reynante Ponte/ UNTV News
Tags: droga, ecstasy, Quezon City, shabu
