Ipinamalas ni Mr. Boyet Allas, mula sa Sultan Kudarat, ang kanyang diskarte at pagiging malikhain sa paggawa ng mga foot pedal wash basins na gawa sa luma at sirang washing machine.

Ang Wash ‘n Machine Project ay kasalukuyang ginagamit ng mga magulang, guro at mag-aaral ng P. C. Bayanihan Elementary School sa paghuhugas ng kanilang mga kamay alinsunod sa health protocols na ipinapatupad ng paaralan.

Katuwang ang mga guro maging ng kanilang mga kaanak sa pagbibigay sirang washing machines habang ang PCBES alumni naman ang nagbigay kulay sa pamamagitan ng pagpipinta ng mga cartoon characters sa paligid nito.

Ayon kay school principal Joane Cher F. Yturalde, isang magandang ideya na gamitin ang mga lumang washing machine sapagkat ito’y kadalasang itinatapon kapag nasira na at mayroon din itong malaking container at drainer.

Dagdag pa ni principal Yturalde, maswerte sila dahil ang asawa ng isa sa kanilang mga guro na si Mrs. Jerly Allas, MT-II, ay nakapag disenyo nito na ginagamitan lamang ng paa dahilan upang mabawasan ang contact at contamination sa mga gumagamit. Aniya, nakatipid pa sila sa pagbili ng mga lababo at iba pang mga kagamitan dahil sa proyektong ito.

(Geraldine Blasé | La Verdad Correspondent)

Tags: diskarte, malikhain, washing machine