Magiging malaking luwag sa biyahe ng papasok sa Cavite ang ginawang flyover sa southbound ng Cavitex na pinasimulan noong nakaraang taon.
Hindi na kinakailangan pang huminto sa dating traffic light ng mga motoristang papasok ng Cavite mula sa Parañaque at ng mga galing sa Cavite papasok ng Aseana.
Sa ngayon ay dalawang lane palang ng fly over ang maaaring madaanan ng mga motorista habang kasalukuyang ginagawa pa ang nalalabing dalawang linya nito.
Inaasahan naman na ngayong buwan ay matatapos ang unang bahagi ng Cavitex enhancement kung saan kabilang ang mga ginagawang road widening at ang binuksang flyover.
Asahan din ang karagdagang mga tollbooths sa Cavitex kung saan mas mabibigyang lunas ang traffic congestion sa Cavitex.
Hinikayat naman ni DPWH Secretary Mark Villar ang mga motorista na gumamit na ng RFID upang hindi na maabala pa sa mga toll booths.
Sa susunod na buwan ay pasisimulan na ang ikalawang bahagi ng Cavitex enhancement kung saan maglalagay ng brigde widening sa Wawa, Las Piñas area na tinatayang nagkakahalaga ng isang bilyong piso.
( Benedict Samsom / UNTV Correspondent )
