METRO MANILA – Nagsumite ng sulat ang DOH sa Philippine Food and Drug Administration (FDA) upang ipahayag ang kanilang intensyon na ma-amyendahan ang mga umiiral na Emergency Use Authorization (EUA) ng COVID-19 vaccines.

Dati nang ipinahayag ng FDA na hindi lihis sa regulatory process kung ang DOH ang magsusumite ng aplikasyon upang ma-amyendahan ang mga bakunang may EUA na sa Pilipinas.

Ayon kay FDA Dir General Eric Domingo, sinimulan na nilang masuri ang mga EUA.

“Nag-sent sila ng letter asking for a review of the EUAs for possible na 3rd shot and we sent the data to our experts to take a look at it para makita nga alin ang maari nating payagan whether homologous same vaccine or heterologous or different vaccine so this is now under evaluation ang hinihingi nila na i- review iyong recommendation ng HTAC” ani FDA Director General, Eric Domingo.

Batay sa rekomendasyon ng Health Assessment Technology Council (HTAC), ang mga posibleng gamitin bilang third dose o booster dose ay ang mga aprubado at kasalukuyang ginagamit na COVID-19 vaccine sa bansa.

Ito ay ang Coronavac ng Sinovac, Astrazeneca, Pfizer, Moderna and Janssen.

Ayon kay DG Domingo, hindi naman gaanong magtatagal ang pagsusuri sa mga ito bago sila maglabas ng desisyon sa mga maaamyendahang EUA

“I’m giving experts naman time to take a look dahil napakarami rin talaga ng studies anoh and there are separate studies, hindi kasi ito katulad ng eua dati na hal. isang bakuna ito several studies iba ibang bansa tapos iba ibang methodology tapos maliliit ang sample size. You have to take them to consideration and put them all together” ani FDA Director General, Eric Domingo.

(Aiko Miguel | UNTV News)

Tags: Covid-19 Vaccines, DOH, FDA