METRO MANILA – Umaasa si Department of Health (DOH) Officer in Charge (OIC) Maria Rosario Vergeire na hindi na nga magiging public health emergency sa 2023 ang COVID-19 at MPOX.
Ayon kay Usec. Vergeire, mas batid na kasi ngayon ng health care workers maging ng publiko ang dapat gawin kapag tinamaan ng mga sakit na ito.
Bagaman may mga naitatala pa ring kaso ng COVID-19 sa Pilipinas, hindi na ganun kadami ang mga severe at critical cases sa bansa.
Sa isinagawang media briefing, sinabi ni World Health Organization (WHO) Director-General Tedros Adhanom Ghebreyesus, na ang patuloy na pagbaba ng pandaigdigang kaso ng COVID-19 ay isang magandang senyales na maaaring nakalagpas na tayo sa most dangerous phase.
Sa kasalukuyan, nasa 18,000 na lang ang aktibong kaso sa bansa, 383 dito ang severe cases, habang 129 ang nasa kritikal.
Dagdag pa ni Vergeire, marami na ring mga Pilipino ang fully vaccinated, malaking tulong sa pagbaba ng kaso sa bansa, at as of December 11, 2022, mahigit 70 milyong indibidwal na ang fully vaccinated.
Sa patuloy na pagbaba ng kaso ng COVID-19 sa bansa, patuloy na paalala ng DOH sa publiko lalo na ngayong holiday season, huwag maging kampante at sundin pa rin ang health protocols.
(Gladys Toabi | UNTV News)
METRO MANILA – Nilinaw ng Department of Health (DOH) na walang naiulat na nasawi dahil sa Monkeypox na tinatawag na ngayong MPOX.
Ayon kay Health Assistant Secretary Albert Domingo, walang pasyenteng nasawi sa MPOX mula sa anomang rehiyon ng bansa .
Nilinaw ito kasunod ng ulat na iniimbestigahan ng DOH sa Central Visayas ang pagkasawi ng isang 27-anyos na lalaki mula sa Negros Oriental, sa pinaghihinalaang kaso ng MPOX.
Paliwanag ni Asec. Domingo, halos magkahawig kasi ang mga butlig o sintomas ng chickenpox, shingles, herpes, at MPIX.
Kaya paalala niya na antayin ang opisyal na pahayag mula sa DOH at iwasan ang paggamit ng hindi beripikadong impormasyon.
METRO MANILA – Umakyat na sa 9 ang bilang ng mga nagpositibo sa sakit na Pertussis sa buong Caraga region mula January 1 hanggang kahapon, June 3.
Ayon sa Department of Health (DOH), mula sa 5 ay naging 9 ang nagpositibo sa rehiyon sa pagpasok ng buwan ng hunyo. 7 rito ay mula sa Surigao Del Norte habang tig-1 naman sa Agusan Del Norte at Agusan Del Sur.
Samantala, nasa 7 naman ang bagong suspected cases na naitala sa rehiyon. Sa ngayon 3 na ang nasawi dahil sa sakit na Pertussis sa Caraga.
Paalala ng kagawaran sa publiko na ang nasabing sakit ay nagsisimula lamang sa mild cough at lagnat na umaabot hanggang 2 Linggo, at pag-ubo naman na umaabot hanggang 6 na Linggo kaya mas maiging magpatingin agad sa doktor kung makaranas ng mga sintomas na ito upang hindi na lumala pa.
METRO MANILA – Binalaan ni House Deputy Majority Leader at dating Department of Health (DOH) Secretary Janette Garin ang publiko laban sa paggamit ng vape.
Kasunod ito ng naitalang kauna-unahang kaso ng pagkamatay sa Pilipinas dahil sa paggamit nito kung saan ang isang 22 anyos na lalaki ang nasawi matapos ang tuloy-tuloy na paggamit ng vape sa loob ng 2 taon.
Sa isang pahayag, sinabi ng mambabatas na kailangan mamulat na ang lahat sa panganib ng paggamit ng naturang device lalo na sa mga kabataan dahil sa masamang epekto nito sa katawan na maaaring mauwi sa kamatayan.
Ikinababahala ni Representative Garin ang mga ulat na nagsasabing may mga kabataang edad 13 anyos ang nahuling gumagamit na ng e-cigarette at vapes kaya muli nitong binigyang-diin na hindi safe na gawing alternatibong paraan ang nasabing kagamitan para maiwasan ang paninigarilyo.
