METRO MANILA – Mariing nagbabala ang Department of the Interior and Local Government (DILG) sa mga lokal at nasyonal na mga kandidato hinggil sa paggamit ng private army groups ngayong Eleksyon 2022.

Kasunod ito ng maraming napapaulat na may posibleng election-related violence sa iba’t ibang lugar.

Hinimok ni Secretary Eduardo Año ang mga gumagamit nito na tigilan na ang mga karahasan, panlilinlang at panggigipit para lang makakuha ng boto.

Dagdag pa aniya, doble-kayod ang mga pulis at mga sundalo na masugpo ang ganitong uri ng sistema upang mapanatili ang kapayapaan at kaayusan at maprotektahan ang karapatan ng mga botante sa darating na halalan sa May 9, 2022.

Batay sa huling ulat ng Philippine National Police, nasa 125 na Local Government Units (LGU) ang na-identify bilang election hotspots sa bansa kung saan may 105 na mga bayan at may 15 na lungsod.

Samantala, sinabi ni Comelec Commissioner at Spokesperson James Jimenez na ang mga lugar na ito ay nasa validation ng Comelec Regional Offices kung saan maglalabas ng opisyal na listahan ng mga lugar gayon din kasaysayan ng mga karahasan at sigalot at presensya ng private army groups na ito’y patuloy na babantayan.

(Daniel Dequiña | La Verdad Correspondent)