Muling naungkat sa pagdinig ng Joint Congressional Oversight Committee on the Automated Elections system ang pahayag kahapon ng Comelec na umano’y tangka ng China na guluhin ang 2016 elections batay intelligence report na natanggap ng komisyon.

Dahil sa impormasyong ito ay ipinasya ng Comelec na ilipat sa Taiwan mula sa China ang manufacturing ng mga rerentahang vote counting machines na gagamitin sa halalan sa susunod na taon.

Paliwanag ni Comelec Commissioner Christian Robert Lim, nag-iingat lamang sila lalo’t nananatili ang tensyon sa Pilipinas at China dahil sa agawan ng teritoryo sa West Philippine Sea o South China Sea.

Ayon kay AES Watch Convenor Maricor Akol, carelessness ang ginawang paglalahad ni Lim sa intel report mula sa military na contact ng isang Commissioner.

Ayon kay Lim, nais lang nilang maging transparent sa kanilang ginagawang paghahanda sa 2016 Presidential Polls.

Sinabi pa ni Lim na desisyon ng EN Banc ang paglipat sa Taiwan ng manufacturing ng mga makina dahil sa maaring maging epekto ng arbitration case ng Pilipinas laban sa China.

Sa panig naman ni JCOC AES Chairman Senator Aquilino Pimentel III hindi na dapat pinakialaman pa ni Lim ang mga diplomatic issues kundi ang mga usapin na may kaugnayan lamang sa halalan.

Ngunit ayon kay Pimentel, mahalagang makarating sa tamang panahon ang mga makina. (Victor Cosare / UNTV News )

Tags: AES Watch Convenor Maricor Akol, Comelec Commissioner Christian Robert Lim, Senator Aquilino Pimentel III