Nangangailangan na ng tulong ng cloud seeding operation ang ekta-ektaryang lupain sa Negros at Zamboanga City.
Sa isinagawang assessment ng Bureau of Soil and Water Management (BSWM), sa 100,000 ektarya ng tubuhan ngayon sa Negros, nasa 20,000 ektarya na ang apektado ng tagtuyot.
Pinangangambahan ding maapektuhan ang produksyon ng asukal dahil sa kakulangan sa tubig.
Isinailalim na rin sa state of calamity ang Zamboanga City dahil sa epekto ng tag-tuyot sa agrikultura na umabot na sa P129 milyon ang danyos base sa datos noong Marso.
Nasa 8,700 ang taniman ng palay, mais, saging, cassava at rubber plantation ang naapektuhan na ng tag-tuyot na ikinabubuhay ng nasa 2,300 mga magsasaka.
Maging ang suplay ng inuming tubig ay kulang narin kaya’t nagsasagawa na sila ng pag-rarasyon.
Ayon sa BSWM ay mangangailangan ng P3-4 milyon ang 60 oras na operasyon ng cloud seeding.
Ngayon na lamang uli nag-request ng cloud seeding operation ang Zamboanga mula noong 2010.
Bukod sa mga nabanggit na lugar ay magsasagawa na rin ng assessment ang BSWM sa iba pang lugar sa bansa na maaari ring naapektuhan ng tag-tuyot.(Rey Pelayo/UNTV Correspondent)
Nanganganib na tuluyan nang hindi masaka ang milyon-milyong ektarya ng lupain sa bansa.
Ayon sa Bureau of Soil and Water Management o BSWM, nasa 38% o 11.2 milyong ektarya ng lupang sakahan ang degraded na o mababa na ang kalidad.
Ito’y dahil sa paggamit ng mga magsasaka ng artipisyal na abono at pamuksa sa peste o pesticide.
Sa pagsusuri ng BSWM, kahitnanasasaka ang ilan sa mga degraded land ay mababa naman ang kanilang ani.
Kung umaani ito ng 100 kaban ng palay sa nakalipas na 30 taon, ngayon ay nasa 30 nalang.
Sa kabila nito, sinabi rin ng BSWM na kaya pa namang masapatan ang pangangailangan ng pagkain sa bansa.
Sa ngayon ay may mga programa naman na ginagawa ang Department of Agriculture gaya ng specific site nutrient management kung saan pinag-aaralan ang mga akmang pananim sa isang sakahan at ang paghikayat sa mga magsasaka na gumamit ng mga organikong pamamaraan ng pagsasaka.
Subalit kung hindi agad na masusulusyonan ang bumababang kalidad ng lupang sakahan ay maaaring maramdaman na ang kakulangan sa pagkain sa loob ng 3-5 taon.( Rey Pelayo/UNTV News )
Tags: Bureau of Soil and Water Management, Department of Agriculture
