Ikinababahala ng Philippine National Aids Council (PNAC) ang posibleng pag-triple ng bilang ng mga Pilipinong magpo-positibo sa Human Immunodeficiency Virus o people living with HIV sa taong 2028.
Anila, aabot sa 265,900 ang HIV/AIDS cases sa Pilipinas kapag hindi napaigting ng pamahalaan ang programa para magamot ang mga PLHIV.
Ayon kay Dr. Joselito Feliciano, lumalabas sa kanilang pag-aaral na pabata ng pabata ang nauugnay sa mapanganib na pakikipag- relasyon.
Sa taong 2028, karamihan sa mga bagong kaso ng HIV ay magmumula sa 15 hanggang 24 taong gulang.
Batay sa ulat ng DOH, lomolobo taon-taon ang bilang ng mga people living with HIV (PLHIV) sa Pilipinas.
Mula sa dalawa kada araw noong taong 2009, umakyat na sa 32 ngayong 2018 ang nada-diagnose na Pilipinong positibo sa HIV.
Ikina-aalarma ito ng DOH lalo na’t lumalabas sa ulat ng United Nations programme on HIV/AIDS o UN AIDS na pitong taon nang ang Pilipinas ang may pinakamataas na kaso ng HIV infection sa Asia-Pacific region.
Batay sa datos ng DOH Epidemiliogy Bureau, mula Enero hanggang Hulyo pa lamang ngayong taon ay nasa mahigit anim na libo na ang PLHIV cases sa Pilipinas.
Ayon kay Billy Santo na tatlong taon nang AIDS survivor at isa sa mga pangunahing nagtataguyod ng The Red Ribbon Project, upang tumulong sa counselling at pagpapagamot ng mga PLHIV, malakas ang impact ng stigma ng HIV sa buhay ng isang taon.
Paalala ng Philippine National Aids Council sa publiko na libre ang HIV testing sa lahat maging sa mga buntis lalo na sa mga taong at risk ang pamumuhay gaya ng mga may multiple partners.
( Aiko Miguel / UNTV Correspondent )
MANILA, Philippines – Nilagdaan na noong Biyernes (July 12) ang Implementing Rules Ans Regualtions (IRR) ng Republic Act 11166 o ang Philippine Hiv and Aids Policy Act (Phil-HIV).
Layon ng naturang IRR na mas maging detalyado ang mga probisyon sa pagpapatupad ng naturang batas. Itinatag ang batas upang makatulong na maagapan ang patuloy na paglobo ng HIV- Aids sa bansa.
Ayon kay Health Secretary Francisco Duque III, ang isa sa pinakamahalagang probinsyon sa IRR ng batas ay ang pagpapahintulot sa mga kabataang edad 15n hanggang 19 na taong gulang na sumailalim ng HIV testing kahit walang parents’ consent.
Ang mga kabataan edad 15 taong gulang pababa na maagang nagbubuntis at kabilang sa itinuturing na may “high-risk behavior” ay maaari din namang sumailalim sa HIV testing at counselling nguni’t dapat ay kasama ang assistance ng isang licensed social worker o health worker.
Noong taong 2008, isa lang kada araw ang naitatalang bagong kaso ng HIV sa bansa. Sa tala ng DOH Abril ngayong taon, 36 na kada araw ang bagong HIV cases.
Isang bagay na nakaka-alarma aniya lalo na’ t 15 taong gulang ang pinakabatang naitatalang positibo sa HIV o people living with HIV o PLHIV.
Sa ilalim din ng batas ay magkakaroon ng tiyak na gamutan gaya ng na nasa mga ospital, rehab centers at close setting institutions na kumakalinga sa mga PLHIV. Dahil mas pinabuti na rin ang gamutan o ang antiretroviral treatments para sa PLHIV.
Ang batas ay mahalaga upang malinang ang treatment care and support para sa mga Plhiv. Ang naturang proposed budget aniya sa mga programa sa pagpapagamot ng PLHIV ay nagkakahalaga ng 1.2 billion pesos.
Sa kasalukuyan ay may 125 HIV/ AIDS treatment hubs sa buong bansa. Sa kabuoan nasa 840 na ang bagong HIV cases sa bansa nitong Abril.
Mahigit 64,000 HIV cases na rin sa bansa ang naitala simula noong 1984 kung saan naitala ang kauna-unahang HIV case sa bansa.
(Aiko Miguel | Untv News)
Sa kabila ng mas pinaigting na kampanya at mga programa laban sa Human Immunodeficiency Virus and Acquired Immune Deficiency Syndrome (HIV/AIDS), patuloy pa rin ang pagtaas ng mga kaso nito.
Mula sa 36.7 milyon na HIV cases sa buong mundo noong 2016, tumaas ito sa 36.9 milyon noong 2017 ayon sa Joint United Nations Programme on HIV/AIDS o mas kilala sa tawag na UNAIDS.
Mayorya sa mga ito ay mga may edad kinse pataas, habang 1.8 milyon naman ay mga kabataan na labing apat na taong gulang pababa, at nasa 9.4 naman ang mga hindi alam na mayroon silang HIV.
Sa Pilipinas, 1,072 bagong kaso ng HIV ang naitala nito lamang Oktubre 2018 ayon sa Department of Health (DOH).
Kaya naman kasabay ng paggunita sa World Aids Day noong Sabado, nanawagan sa publiko ang UNAIDS na sumailalim sa HIV testing.
Paliwanag ni United Nations Programme for HIV and AIDS Country Director Louie Ocampo, isa sa mga dahilan ng paglala ng sakit ay ang hindi pag-alam sa estado ng kalusugan ng isang tao.
Malaki umano ang maitutulong ng pagsailalim sa treatment ng mga taong may HIV dahil maiiwasan na mauwi ito sa pagkasawi.
Ayon sa HIV positive na si Owie, taong 2005 nang malaman ang kaniyang sakit. Nakakatulong aniya ang tamang paggamot upang makapamuhay ng normal ang isang tulad niya.
Sa tala ng UNAIDS, 21.7 milyon lamang sa mga naitalang maysakit na HIV ang sumasailalim sa antiretroviral treatment.
( Mai Bermudez / UNTV Correspondent )
Simula Enero hanggang Mayo ngayong taon, 94 na panibagong kaso ng HIV/AIDS ang naitatala ng Department of Health (DOH) sa Rehiyon 8. Mas mataas ito kumpara sa 181 na mga kaso na datos sa buong taon ng 2017.
Kaya naman nanawagan ang Department of Health (DOH) sa mga lokal na pamahalaan ng Eastern Visayas na bumuo ng mga HIV/AIDS council sa kanilang lugar.
Ito ay upang masiguro na akma ang mga isasagawang pakikipag-ugnayan sa lahat ng sektor ng komunidad lalo na sa mga kabataan pagdating sa sakit na HIV /AIDS.
Ayon kay Boyd Roderick Cerro, head ng Regional Epidemiology and Surveillance Unit ng DOH 8, kalimitan sa mayroong mataas na bilang ng kaso ng HIV/AIDS ay sa mga matataong lugar ng rehiyon kagaya ng Tacloban City na may pinakamataas na bilang.
Umaapela rin ang DOH sa mga magulang na bantayang maigi ang kanilang mga anak dahil base sa kanilang pag-aanalisa, 34% ng mga nagkakasakit ay nasa 15-24 ang edad at 50% naman ang nasa 25-34 ang edad.
Samantala, ang pinakabatang na-diagnose naman na maysakit na HIV/AIDS sa Eastern Visayas ay 2 taong gulang sa pamamagitan ng mother-to-child transmission.
( Archyl Egano / UNTV Correspondent )
