Kung sa Metro Manila at ilan pang bahagi ng bansa ay matinding init ang naranasan ng ating mga kababayan nitong weekend, sa Brgy. Paoay sa Atok, Benguet naman ay naranasan ang pag-ulan ng yelo noong Sabado.
Dahil dito, sira-sira ang ilang green house at mga tanim na gulay ng mga magsasaka sa lugar.
Ayon sa ilang magsasaka, pangkaraniwan na sa kanila ang pag-ulan ng yelo dahil taon-taon ay nakakaranas sila ng hailstorm sa kanilang lugar na nagtatagal ng tatlo hanggang limang minuto.
Pero noong Sabado, tumagal ang pag-ulan ng yelo ng halos isang oras kaya naman matindi ang naging pinsala nito.
Ngunit tiniyak naman ng mga magsasaka na wala dapat ikabahala ng mga mamimili dahil sapat ang suplay ng gulay sa Benguet Province para sa mga consumer.
Ngayong araw ay mag-iinspeksyon naman ang Municipal Agriculture Office at Provincial Agriculture Office sa Brgy. Paoay upang alamin kung gaano kalaki ang pinsalang iniwan ng ng hailstorm.
( Grace Doctolero / UNTV Correspondent )
Tags: Benguet, tanim na gulay, yelo
Nakumpleto na ng lokal na pamahalaan ng Benguet ang mga kinakailangang dokumento para sa aplikasyon nito na maging minahang bayan ang walumpung ektaryang lupain sa bayan ng Itogon.
Ayon sa Mines and Geosciences Bureau (MGB) ng Cordilerra Administrative Region.
Nasuri na rin anila ang lugar at napatunayan na ligtas itong gawing small scale mining site.
Kaya naman, nagsumite na sila ng rekomendasyon sa opisina ni Department of Environment and Natural Resources (DENR) Secretary Roy Cimatu upang pormal nang maaprubahan ang Itogon, Benguet bilang minahang bayan. Target ng MGB na masimulan ang operasyon nito sa Disyembre.
Bukod sa Itogon, isa pang bayan sa Benguet ang target gawing minahang bayan ng lokal na pamahalaan.
Kapag pormal nang nabuksan ang minahang bayan, makikinabang dito ang nasa apat na libong mga minero sa Benguet na nawalan ng hanapbuhay matapos na ipatigil ng DENR ang operasyon ng small scale mining sa buong Cordillera Region.
Ito ay matapos ang nangyaring killer landslide sa Brgy. Ucab, Itogon, Benguet noong ika-15 ng Oktubre dahil sa malalakas na pag-ulan na dala ng Bagyong Ompong, kung saan umabot sa 62 ang nasawi.
Samantala, uumpisahan na rin ng MGB Cordillera at Department of Public Works and Highways (DPWH) ang inspeksyon sa mga lugar kung saan nakatayo ang mga gusali ng DPWH sa rehiyon.
Kaugnay ito ng utos ni Secretary Mark Villar na tiyaking sa ligtas na lugar nakatayo ang mga opisina at proyekto ng kagawaran.
Ito ay upang hindi na maulit ang nangyari sa Barangay Habawel, Natonin, Mt. Province sa kasagsagan ng pananalasa ng bagyong Rosita kung saan natabunan ng gumuhong lupa ang ginagawang gusali ng DPWH.
( Grace Doctolero / UNTV Correspondent )
Tags: Benguet, DENR, minahang bayan
Nasa dalawang libong elementary at high school students sa Itogon, Benguet ang hindi pa nakakapagklase simula pa noong nakaraang linggo.
Ito ay matapos ipag-utos ni Itogon Mayor Victorio Palangdan ang suspensyon ng klase sa walong paaralan sa syudad mula ika-10 ng Oktubre.
Ang mga naturang paaralan ay kabilang sa natukoy ng Mines and Geosciences Bureau (MGB) na kabilang sa mga at risk na lugar sa syudad.
Hindi pa tiyak ng lokal na pamahalaan kung hanggang kailan ang itatagal ng suspensyon dahil wala pang lugar na permanenteng mapaglilipatan sa mga estudyante.
Hinihintay rin ng LGU at Department of Education (DepEd) ang re-assessment ng MGB para malaman kung alin sa mga paaralan ang maaari pang gamitin at alin ang tuluyan nang aabandunahin.
Sa ngayon, inihahanda na ng LGU ang learning tent center na itatayo sa Bua-Itogon Benguet. Ito ang pansamantalang gagamitin ng mga apektadong mag-aaral upang makahabol sila sa kanilang aralin.
Samantala ngayong araw, nakipagdayalogo si DENR Secretary Roy Cimatu sa mga residente ng Itogon, Benguet hinggil sa stoppage order ng mga small scale mining operation sa naturang bayan.
( Grace Doctolero / UNTV Correspondent )
Dahil sa nangyaring pagguho sa iba’t-ibang lugar sa Itogon Benguet matapos ang pananalasa ng Bagyong Ompong na kumitil ng maraming buhay.
Naglabas ang Department of Environment and Natural Resources (DENR) ng bagong geohazard map sa Itogon, Benguet.
Ayon kay DENR Cordillera Regional Executive Director Ralph Pablo, dati pula ang kulay ng mga pinakadelikadong lugar sa Itogon pero ngayon may mga kulay brown na.
Kapag kulay pula sa geohazard map, ibig sabihin nito ay susceptible o madali gumuho ang lupa lalo na kapag may bagyo.
Pero kapag kulay brown, very highly susceptible na sa landslide ang mga lugar na ito, ibig sabihin ay hindi na dapat magtayo ng anomang tirahan o hanapbuhay sa lugar. Kahit konting ulan lamang ay maari nang gumuho ang lupa.
Ayon kay DENR Assistant Joselin Marcus Fragada, ito ay dahil na rin sa mga nadiskubreng butas o tunnel sa ilalim ng lupa dulot ng mga pagmimina. Siyam na lugar ang tinukoy ng DENR na hindi na maaring tirhan.
Kabilang na rito ang Barangay Ucab kung saan higit 60 ang namatay dahil sa landslide matapos manalasa ang Bagyong Ompong.
Samantala, pinutol na ng Benguet Electric Cooperative ang nasa 366 na iligal na linya ng kuryente sa mga lugar na ginagamit ng mga minero para sa ball mill na siyang gumigiling sa nakukuhang mineral ore.
( Grace Doctolero / UNTV Correspondent )
Tags: Benguet, DENR, geohazard map
