Isinapubliko na ng Bulacan Police ang artist’s sketch ng suspek sa pagpaslang kay dating Pandi, Bulacan Vice Mayor Robert Rivera kagabi.

Ayon kay Police Chief Inspector Victor Bernabe, nabuo ang larawan sa pamamagitan ng deskripsyon ng dalawang tricycle driver na umano’y nakakita sa suspek.

May taas itong 5’7, katamtaman ang pangangatawan, nakasuot ng salamin sa mata, naka short ng itim at naka t-shirt ng kulay blue.

Tugma naman ito sa nakuhang cctv footage ng mga pulis kung saan makikita ang suspek habang sinusundan ang isang kotse sa harap ng barangay hall.

Palaisipan naman sa asawa ng biktima kung sino ang nasa likod ng pamamaril dahil wala naman umano itong kaaway.

Ngunit inihayag niya na may natanggap na death threat ang biktima ilang araw bago ang krimen.

Si Rivera ay nagtamo ng tatlong tama ng bala sa ulo at dalawa sa dibdib gamit ang kwarenta’y singko na kalibre ng baril.

Sa ngayon nakaburol na ang labi ni rivera sa kanilang bahay.

Iniimbestigahan na rin ng pulisya kung may bahid pulitika ang krimen lalo’t kilalang political leader si Rivera sa bayan ng Pandi.

(Nestor Torres / UNTV Correspondent)

Tags: Artist's sketch ng suspek, Bulacan, dating vice mayor ng Pandi, PNP