Itutuloy na ng House Committee on Justice ngayong araw ang botohan sa nilalaman ng articles of impeachment laban kay Chief Justice Ma. Lourdes Sereno.
Una na itong ipinagpagpaliban noong isang linggo dahil hindi pa magkasundo ang mga myembro ng kumite kung anu-ano ang mga grounds na kanilang ilalagay.
Ayon kay Committee Chairman Rey Umali, mula sa pitong grounds na ngayon ay kasama sa articles of impeachment ay pipili pa rin sila ng may mabibigat na ebidensyang mayroon sila.
Nanindigan naman si Umali na hindi nakikialam si Pangulong Rodrigo Duterte sa impeachment proceedings laban sa punong mahistrado. Dagdag pa nito, ni minsan ay hindi siya kinausap ng pangulo hinggil dito.
Kapag nakakuha ng mayorya ng boto ang articles of impeachment, may 10 araw ang kumite para dadalhin na ito sa plenaryo.
Subalit una nang sinabi ni House Majority Floor Leader Rudy Fariñas na hihintayin muna nila ang magiging desisyon ng Korte Suprema sa quo warranto petition na isinampa laban kay CJ Sereno.
Base sa rules, kung maisasama sa agenda ang artices of impeachment sa plenaryo sa pagbabalik ng sesyon sa ika-14 ng Mayo, may hanggang Oktubre ang plenaryo para pagbotohan ito.
1/3 o 98 na boto ang kailangan para tuluyang ma-impeach ng Kamara si CJ Sereno.
( Grace Casin / UNTV Correspondent )
Tags: articles of impeachment, CJ Sereno, plenaryo
Kumalat sa social media ang mga panawagan kay dating Chief Justice Ma. Lourdes Sereno na tumakbong senador sa 2019 midterm elections.
Si Ifugao Rep. Teddy Baguilat, may ginawa pang survey sa kanyang twitter account.
Sa twitter post ni Baguilat, nanawagan ito sa partido liberal na ikunsidera si Sereno sa kanilang senate slate, dahil kailangan ni sereno ng platform para ipagpatuloy ang kanyang laban para protektahan ang hudikatura.
Suportado rin ito nina Caloocal Rep. Egay Erice at dating Presidential Spokesperson Edwin Lacierda, anila kailangan umano ng oposisyon ang kakahayan ni Sereno lalo na sa Senado. Maging ang ilang mga netizen tinutulak din si Sereno sa Senado.
Wala pa namang tugon sa mga panawagang ito ang kampo si CJ Sereno.
Pero ayon kay Liberal Party President Kiko Pangilinan, handa silang tanggapin si Sereno oras na magpasya itong tumakbo sa pagkasenador sa ilalim ng kanilang partido.
( Grace Casin / UNTV Correspondent )
Kumpyansa si Vice President Leni Robredo na hindi matutulad ang kanyang kapalaran kay Chief Justice Ma. Lourdes Sereno.
Tiwala ang pangalawang pangulo na mananaig ang katotohan na siya ang nanalo noong 2016 national elections at walang nangyaring dayaan.
Sinabi nito na hindi siya magpapaapekto sa mga kumakalat sa social media na siya na ang susunod kay Sereno na mapapatalsik sa pwesto.
Sa ngayon, patuloy ang manual recount of votes nina Robredo at Marcos sa 5,418 precincts sa mga probinsya ng Camarines Sur, Iloilo at Negros Oriental.
Ngunit ilang beses nang naghain ng mosyon ang kampo ni Robredo na panatilihin ng PET sa recount ang 25 percent threshold tulad ng ipinatupad ng Commission on Elections sa mga binibilang na balota.
Itinuturing ng PET na hindi balido ang 25 percent threshold o mga balotang mayroon lamang ¼ shade.
( Mai Bermudez / UNTV Correspondent )
Tags: balota, CJ Sereno, VP Leni Robredo
Nagsalita na ang Korte Suprema bilang final arbiter ng batas sa bansa.
Kaya nanawagan si Presidential Spokesman Harry Roque na igalang ang naging desisyon ng kataas-taasang hukuman na pagbigyan ang hiling na patalsikin ang punong mahistrado na si Maria Lourdes Sereno sa pamamagitan ng quo warranto petition.
Dagdag pa ni Roque, ang Korte Suprema bilang isang sangay ng pamahalaan ay may bukod na kapangyarihan at tungkuling itaguyod ang ating konstitusyon. Kaya ang desisyon ng Korte ay patunay aniyang nakapangyayari ang batas sa bansa.
Samantala, binigyang-diin naman ni Chief Presidential Legal Counsel Atty. Salvador Panelo na kahit hindi sang-ayon ang iba sa desisyon ng Supreme Court (SC), kailangan pa rin itong sundin dahil ito ang patunay na umiiral ang demokrasya sa bansa.
Nanindigan din si Panelo na hindi lang impeachment ang paraan para mapatalsik ang isang “impeachable officer”. Wala pang impormasyon ang opisyal sa kung sino ang napipisil ni Pangulong Rodrigo Duterte na hahaliling bagong chief justice.
Samantala, ikinabahala naman ni Vice President Leni Robredo ang magiging epekto ng desisyong ito ng SC.
Aniya, tahasang pagyurak sa konstitusyon ang naging hakbang na ito ng mga mahistrado.
Sa nangyaring ito, nakumpormiso na ang pundasyon ng hudikatura kaya nangangamba ang pangalawang pangulo na baka wala na umanong matakbuhan ang mga Pilipino para humingi ng hustisya.
Nanawagan ito sa publiko na bantayan ang mga susunod na pangyayari sa Korte Suprema at makiisa sa pagtatanggol sa demokrasya.
( Rosalie Coz / UNTV Correspondent )
Tags: CJ Sereno, Korte Suprema, Malacañang
