Nahuli ng mga tauhan ng Manila Police District (MPD) ang apat na lalaki sa isinagawang buy bust operation sa Paras Street, Pandacan, Manila bandang alas nuebe kagabi.
Target ng operasyon ang isang hinihinalang tulak ng shabu na kinilala sa pangalang Reynaldo Punzalan, disi otso anyos at residente sa lugar. Nagpanggap na buyer ng shabu ang isang pulis at nang magkabayaran na ay inaresto na ang suspek. Kasama rin sa naaresto ang tatlo pang lalaking hinihinalang parokyano ng suspek.
Nasabat sa mga suspek ang labingdalawang sachet ng hinihinalang shabu. Aminado naman si Punzalan sa pagtutulak nito ng shabu. Pinagkukuhanan umano nito ng shabu sina alyas Obet at alyas Orlan na parehong taga-Mandaluyong.
Nagsasagawa na ng follow-up operation ang mga otoridad upang tugisin ang iba pang posibleng kasama ni Punzalan sa operasyon nito.
Kasalukuyan nang nasa kustodiya ng MPD Station 10 ang mga suspek na mahaharap sa kasong paglabag sa Republic Act 9165 o ang Comprehensive Dangerous Drugs Act of 2002.
( Asher Cadapan Jr. / UNTV Correspondent )
Tags: arestado, buy bust operation, drug suspect
Nagtuturuan ang dalawang kabataang sa Quezon City kung sino ang may-ari ng kaha ng sigarilyo na naglalaman ng hinihinalang shabu nang maaresto sila sa buy bust operation ng Quezon City Police District Station 3 sa tapat ng isang fast food chain sa Barangay Culiat sa Quezon City, alas nuebe y medya kagabi.
Ayon sa PNP, nakabili umano ng shabu ang kanilang operatiba sa isa sa mga suspek na si Yassher Logan, pero itinanggi naman ito ni Yassher. Sinabi niya na inaya lang daw siyang sumama ng kaibigan niyang si Julhamin Isla. Sagot naman ni Isla, inaya lang din daw siya ni Yassher na bibili sa fastfood chain.
Narekober sa mga suspek ang sampung gramo ng hinihinalang shabu na nagkakahalaga ng animnapung libong piso.
Samantala, tatlo naman ang naaresto sa buy bust operation ng QCPD Station 7 sa Donya Soledad Avenue Extension, Barangay Don Bosco, Paranaque City.
Unang nagtransaksyon ang mga suspek at ang nagpanggap na buyer sa Cubao sa Quezon City pero nagbago umano ang isip ng mga suspek at nag-aya sa isang mall sa Paranaque.
Kinilala ang mga suspek na sina Herna Tammyang alyas “Ayang”, ang lider ng grupo, Fatma Saabdulama alyas “Fat” at Hassan Taman alyas “Nur”.
Narekober sa mga suspek ang apat na sachet ng hinihinalang shabu na naglalaman ng 200 gramo na street value na 1.36 milyong piso, dalawang pirasong 1,000 pisong bill buy bust money, dalawang cellphone at 150 piraso ng budol money.
( Gerry Galicia / UNTV Correspondent )
Agad na inaresto ng Quezon City Police District (QCPD) Station 7 ang mag-live in partner na sina Melchor Guadiz at Olga Macabangon nang makabili ng limang daang pisong halaga ng shabu sa kanila ang pulis na nagpanggap ng buyer sa Barangay Soccoro, Quezon City alas otso kagabi.
Ayon sa QCPD, matagal na nilang minamanman ang dalawa na umanoy supplier ng droga sa ilang lugar sa Cubao.
Nang kapkapan ang suspek, nakuha sa mga bulsa nito ang dalawang cellphone, dalawang coin purse na naglalaman ng labing pitong sachet ng hinihinalang shabu at limang daang pisong marked money. Sa kabila nito, todo tanggi pa rin ang mga suspek.
Ayon sa PNP, nakulong na si Melchor Guadiz sa kasong robbery-hold up at nakalaya noong taong 2016.
Sa ngayon, patuloy pa ang ginagawang pagtugis ng PNP sa supplier ng mga suspek na taga-Cavite.
( Gerry Galicia / UNTV Correspondent )
Tags: buy bust operation, droga, QCPD
Arestado ang anim na drug suspect sa buy bust operation ng PNP sa Bacoor City, Cavite noong ika-29 ng Nobyembre. Target ng operasyon si Nida Sarif alyas “Madam”.
Inaresto rin ang limang kasama nito na sina Kamar Malawe, Irene Collado, Vivencio Balatayo, April Joy Ramirez at isang alyas Acel.
Naging susi sa pagka-aresto sa suspek ang report sa kanila na may malakas umanong magbagsak ng iligal na droga sa isang motel sa Bacoor City.
Nang makumpirma ng PNP ang intelligence report, agad isinagawa ang paghuli sa suspek. Natuklasan din ng PNP na ang suspek na si alyas Madam ay matagal nang tinutugis na tulak ng droga sa Lucena City.
Nakumspiska sa mga ito ang nasa siyam na pakete ng hinihinalang shabu na tinatayang nagkakahalaga ng mahigit siyam na raang libong piso at pinatuyong dahon ng marijuana na may bigat na 0.63 grams.
Samantala, isa naman sa mga suspek ang napag-alamang miyembro ng local gun for hire sa Mindanao.
Sa ngayon ay nasa kustodiya na ng pulisya ang mga naarestong suspek at mahaharap sa kasong paglabag sa Republic Act 9165 o ang Comprehensive Dangerous Drugs Act of 2002.
( Benedict Samson / UNTV Correspondent )
Tags: buy bust operation, Cavite, iligal na droga
