Humihingi ng kopya ng salaysay ni Marc Ventura ang isa sa abogado ng mga respondent sa kaso ng pagkamatay ng hazing victim na si Horacio “Atio” Castillo III.
Mismong si Justice Sec. Vitaliano Aguirre ang nagsabi nitong nakaraang Miyerkules na nagbigay ng salaysay si Ventura at isiniwalat ang ginawang pananakit kay Atio sa initiation rites. Nais umano nitong tumestigo kaya’t tinanggap na ito sa Witness Protection Program.
Ayon kay Atty. Paris Real, dapat silang mabigyan ng kopya ng naturang salaysay upang masagot nila ito.
Ngunit sagot ng DOJ panel, sila man ay hindi pa nabibigyan ng kopya nito. Para naman sa abogado ng pamilya Castillo, paraan lamang ito upang ma-delay ang pagresolba sa kaso.
Napagbuntunan din ni Atty. Real ang media at nais na mapatawan ng contempt ang mga nagbalita sa laman ng salaysay ni ventura.
Ngunit sabi ng DOJ panel, idulog na lamang niya ito sa opisina ni Secretary Aguirre.
Natutuwa naman ang pamilya Castillo sa pagsisiwalat na ginawa ni Ventura dahil malaking tulong ito sa pagkamit ng hustisya para kay Atio.
Pero sa ngayon, dapat pa rin itong makasuhan ayon sa kanilang abogado.
( Roderic Mendoza / UNTV Correspondent )
Tags: Atty. Paris Real, Horacio “Atio” Castillo III, Marc Ventura
Isang simpleng funeral rites ang isinagawa kahapon para sa UST law student na biktima ng hazing na si Horacio “Atio” Castillo. Dinaluhan ito ng kanyang mga kaanak, mga kaibigan at kaklase.
Nakasuot ng puting damit na may tatak na “Justice for Horacio” ang mga kamag-anak ng hazing victim habang naka itim na damit naman ang mga kaibigan nito.
Bago ang libing ay isang maiksing misa muna ang isinagawa sa Santuario de San Antonio sa Makati City. Pagkatapos nito, pasado alas singko kahapon ay dinala na ang labi ni “Atio” sa Manila Memorial park kung saan ito inilibing.
Ayon sa pamilya ni “Atio” hindi dito nagtatapos ang kanilang laban, hindi umano sila titigil hanggat hindi nakakamit ang hustisya.
Naniniwala naman ang tiyuhin ni “Atio” na ito na ang katapusan ng Aegis Juris Fraternity.
Maliban sa mga kaanak at kapamilya ng biktima, dumalo din sa libing ni Horacio ang ilang miyembro ng Volunteers Against Crime and Corruption o VACC.
Nangako ang mga ito sa pamilya ni Atio na tutulong upang makamit ang katarungan para sa biktima.
( Macky Libradilla / UNTV Correspondent )
