TONDO, Maynila – Limang magkakapatid na menor de edad ang nasawi sa sunog na sumiklab sa isang tatlong palapag na bahay sa Laperal Street corner Herbosa Street, Tondo, Maynila kanina.
Kinilala ang mga nasawi na sina John Mike Christer Gemeniano, 12 anyos; Baby Michael Gemeniano, pitong taong gulang; Marcel Gemeniano, limang taon; Miel Michael Gemeniano, 4 na taon at Mikaela Gemeniano, isang taong gulang.
Habang nakaligtas naman ang isa pang kapatid ng mga biktima na si John Michael.
Sumiklab ang sunog bandang alas nuwebe ng umaga kanina, habang nasa labas ng bahay ang ina ng mga biktima upang bumili ng pagkain.
Ayon sa Bureau of Fire Protection (BFP) Manila, napabayaang kandila ang ugat ng sunog.
Pero ayon sa nanay ng mga biktima, depektibong kawad ng kuryente ang posibleng sanhi ng apoy dahil tiniyak niyang ligtas ang kanilang bahay bago siya umalis.
