Nasa 313 pribadong pamantasan at kolehiyo ang pinayagan ng Commission on Higher Education (CHED) na magtaas ng matrikula at iba pang school fees para sa school year 2015-2016.

Tumaas ng average na 6.48% ang matrikula at ibang school fees ng mga pinayagan na eskuwelahan.

Sa kabuuan, nasa 1,683 na institusyon ang nag-apply sa CHED para makapagtaas ng singil.

Sa naturang bilang, 283 o 16% ang humiling na makapagtaas ng matrikula habang nasa 212 kolehiyo at pamantasan naman o 12.60% ang nagpaaalam na magtaas ng kanilang ibang school fees.

Sa matrikula pa lamang, ang average increase ay umabot ng 6.17% o P29.86 per unit habang ang ibang school fees naman ay tumaas sa average na 6.55% o P135.60.

Samantala, hindi naman inaprubahan ng CHED ang pagtataas ng matrikula ng mga pribadong tertiary schools sa Eastern Visayas region na matinding naapektuhan ng bagyong Yolanda.