300 sako ng bigas, karton-kartong canned goods at noodles ang ibinigay ng Zamboanga City para sa mga residente na apektado ng bakbakan sa Marawi City.

Ipadadala ang mga relief good ngayong araw sa pamamagitan ng navy vessel katuwang ng AFP Western Mindanao Command.

Mamayang hapon naman ay inaasahang maipamimigay na ito sa mga nangangailangan.

Ayon kay Zamboanga City Mayor Beng Climaco, ramdam nila ang hirap na pinadadaanan ngayon ng mga residente ng Marawi.

Naranasan din nila ang kaparehong sitwasyon nang mangyari ang halos isang buwang kaguluhan sa lugar noong 2013 Zamboanga Siege.

Ilang lugar din ang nagpaabot sa kanila ng tulong.

Tiniyak naman ng AFP WestMinCom, na makararating ng maayos ang tulong sa mga biktima ng kaguluhan.

(Dante Amento)

Tags: Marawi, Zamboanga city